Աշխարհի առաջնությունը Լոնդոնում չի անցկացվի

Chess Promotions LTD (CPL) ընկերությունը, որը հանդես էր եկել որպես 2012-ին Լոնդոնում շախմատի աշխարհի չեմպիոնի մրցաշարի կազմակերպիչ, պաշտոնապես հայտարարել է, որ հրաժարվում է մրցաշարի անցկացումից:

Ըստ chess-news.ru- ի` ընկերության պաշտոնական հայտարարության մեջ նշվում է, որ CPL-ն ՖԻԴԵ-ի հետ մրցաշարը Լոնդոնում կազմակերպելու հարցի շուրջ բանակցություններ է վարում 2010-ի փետրվարից և ՖԻԴԵ-ին է փոխանցել 50 հազար եվրո, որպեսզի դրա անցկացման իրավունքը վերապահվի իրենց:

Այնուհետև կազմակերպությունը ՖԻԴԵ-ին է դիմել առեւտրային պայմանագիրը վավերացնելու հարցով, որով պարտավորվել է աշխարհի առաջնությունը կազմակերպել այն նույն ֆինանսական պայմաններով, որով անցկացվել էր 2010-ին Սոֆիայում կայացած աշխարհի առաջնությունը:

CPL-ն խնդրել է, որպեսզի իրենց առաջարկությունն ընդունվի մինչև 2011-ի հունվարի 29-ը, սակայն ոչ մի պատասխան չի ստացվել:

Այդ պատճառով կազմակերպությունը հետ է վերցնում իր հայտը, որպեսզի ՖԻԴԵ-ի նախագահական խորհրդի` այսօր սկսվող նիստը կարողանա այլ թեկնածություններ քննարկել:

Հիշեցնենք, որ 2012-ին Լոնդոնում պետք է կայանար աշխարհի թագի համար մրցախաղը աշխարհի գործող չեմպիոն Վիշվանաթան Անանդի և հավակնորդների մրցաշարի հաղթողի միջև: Հավակնորդների մրցաշարը կայանալու է Կազանում, որին մասնակցելու է նաև մեր ուժեղագույն շախմատիստ Լևոն Արոնյանը: