Ծամոն են տվել ժողովրդին, որ զբաղվի

Պետությունն այնքան պարտավորություններ ունի ներսում, որ չի կատարում, Հայաստանում այնքան ներքին խնդիրներ կան, որ այլ հարցերի մասին մտածելն այսօր արդիական չէ. այսօր խոսելով երկպալատանի խորհրդարան ստեղծելու գաղափարի մասին` ասել է «Մխիթար Սեբաստացի» կրթահամալիրի տնօրեն Աշոտ Բլեյանը:

Երկպալատանի խորհրդարանի թեման նա համարել է ծամոն, որով ուզում են զբաղեցնել հայաստանցիներին` նրանց շեղելով իրական ու ավելի լուրջ խնդիրներից: «Դա լուրջ չէ, որովհետեւ չի բխում ոչ միջազգային իրավունքի նորմերից եւ ոչ էլ արտացոլում է հայաստանցիների այս պահի պահանջը: Ես լուրջ եմ վերաբերվում Հայաստան-Սփյուռք հարաբերություններին` դա համարելով կենսական ու կարեւոր խնդիր, բայց այդ «երկպալատանի երազը» չէ, որ կարող է նպաստել Հայաստան-Սփյուռք կապերի մերձեցմանը»,- նշել է Ա.Բլեյանը:

«Գաղափարը նոր չէ, առաջ է քաշվել դեռ 2007 թ. եւ, ըստ էության, սփյուռքյան պահանջ էր»,- այս կապակցությամբ նշել է «Ազգ» օրաթերթի գլխավոր խմբագիր, Արմենական-ՌԱԿ կուսակցության նախագահ Հակոբ Ավետիքյանը: «Կարծում եմ` դա դեռեւս հում, անմշակ գաղափար է, քանի որ բազմաթիվ բարդություններ կարող է առաջացնել»,- նշել է նա:

Ըստ Ավետիքյանի` գաղափարի բարձրաձայնման համար սխալ ժամանակ է ընտրված. այն պետք է դեռ ներքին քննարկումներ անցներ ու մշակման ենթարկվեր: Սակայն նա նշել է, որ Սփյուռքի 7 միլիոն հայության շահերը ներկայացնելու համար կազմակերպչական կառույց ստեղծելու հարցում նույնիսկ ուշացել ենք, թեպետ չի բացառվում, որ «Սփյուռքյան սենատի» գաղափարը կարող է հակասության մեջ մտնել Սփյուռքում վաղուց արդեն շրջանառվող կազմակերպչական նոր կառույցի ստեղծման գաղափարի հետ: