Ռոնալդուն վնասվածք ստանա, Էդգար Մանուչարյանն էլ ֆուտբոլով զբաղվի. ՀՖՖ նախագահը ներկայացրեց ֆուտբոլի ազգային հավաքականի նոր մարզչին

Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր պաշտոնապես ներկայացրեց ֆուտբոլի ազգային հավաքականի նոր մարզիչ Բեռնար Շալանդին ու նրան հանձնեց ՀՀ ֆուտբոլի ազգային հավաքականի մարզաշապիկը:

Իր խոսքում Ռուբեն Հայրապետյանը նշեց, որ վերջին շրջանում բավական երկար քննարկվեց ազգային հավաքականի գլխավոր մարզչի ընտրության հարցը. ՀՖՖ-ն ու անձամբ ինքը բազմաթիվ մասնագետների հետ բանակցություններ անցկացրեցին, սակայն 49 պոտենցիալ թեկնածուներից ընտրվեղ Շալանդը:

Այնուհետեւ, պատասխանելով լրագրողների հարցերին, Ռուբեն Հայրապետյանն անդրադարձավ ազգային հավաքականի վերջին' Ռուսաստանի հավաքականի հետ անցկացրած ընկերական հանդիպմանը' ընդհանուր առմամբ, խաղը գնահատելով «վատ»: Նա նշեց, որ հավաքականը ավելի լավ խաղ կարող էր ցուցադրել, որը չարեց' ելնելով մի շարք պատճառներից: ՀՖՖ նախագահը առանձնացրեց այն, որ մեր ազգային հավաքականը միշտ էլ մարտ ամսին այնքան էլ հաջող ելույթ չի ունեցել, բացի այդ' Յուրա Մովսիսյանն էր վնասվածքից նոր ապաքինվել:

Իսկ հավաքականի նորանշանակ մարզիչ Բեռնար Շալանդը նշեց, թե, նայելով խաղի վիճակագրությանը, մեր հավաքականի ֆուտբոլիստները 6 կիլոմետրով ավելի քիչ են վազել խաղադաշտում, քան ռուսները, իսկ սա շատ կարեւոր խնդիր է: Նա ընդգծեց, սակայն, որ, ի դեմս Հայաստանի հավաքականի, ինքը տեսնում է թիմ, որն ունի հաջողությունների հասնելու մեծ պոտենցիալ:

Անդրադառնալով Եվրո 2016-ին այն խմբին, որում ընդգրկված է Հայաստանի ազգային հավաքականը, նորանշանակ մարզիչն ասաց, որ խումբն, իրոք, բավականին ուժեղ թիմերիվ կազմված, բայց, օրինակ, Հայաստանի հավաքականը կարողացել է նախկինում հաղթել թե' Սերբիայի, թե' Դանիայի հավաքականներին: Ինչ վերաբերում է  Պորտուգալիայի հավաքականին, որի հետ մեր հավաքականը  պետք է չափի իր ուժերը, ապա Բեռնար Շալանդը կատակեց` նշելով, թե հույս ունի, որ Ոոնալդուն վնասվածք կստանա ու չի մասնակցի հանդիպմանը: Իսկ արդեն լուրջ` մարզիչը հույս ունի, որ կհաջողվի այս անգամ խմբային փուլից դուրս գալ, քանի որ Հայաստանի հավաքականը նման հնարավորություն ունեցել է թե' աշխարհի առաջնության ընտրական  փուլում, թե' Եվրո 2012-ի խմբային փուլում:

Լրագրողների խնդրանքով'  ՀՖՖ նախագահն ու նորանշանակ մարզիչն անդրադարձան մեր թիմի մարզավիճակին ու խնդիրներին: Այն դիտարկմանը, թե մեր ազգային հավաքականը խնդիրներ ունի պաշտպանության գծում, Ռուբեն Հայրապետյանը պատասխանեց, որ չի կարելի նման որակումներ տալ, քանի որ պաշտպանությունը սկսվում է հարձակման գծից, եւ եթե հարձակվողները լավ խաղային, ապա պաշտպանները չէին հայտնվի անօգնական վիճակում:

Լրագրողները հետաքրքրվեցին նաեւ Էդգար Մանուչարյանով, թե նրան կհրավիրե՞ն հավաքական: Ռուբեն Հայրապետյանն արձագանքեց. «Էդգար Մանուչարյանն ո՞վ է...»: Իսկ հետո շարունակեց, որ երբ Էդգար Մանուչարյանը սկսի նորմալ մարզվել, այն ժամանակ էլ մարզիչը կորոշի' հրավիրե՞լ նրան հավաքական, թե՞ ոչ: Իսկ ներկայումս, Ռուբեն Հայրապետյանի բնորոշմամբ, Էդգար Մանուչարյանը զբաղվում է ամեն ինչով, բացի ֆուտբոլից:

Իսկ Բեռնար Շալանդն ասաց, որ եթե դրսում չկան այնպիսի պաշտպաններ, որոնց կարելի է հրավիրել հավաքական, ապա ինքը պետք է աշխատի տեղի ֆուտբոլիստների հետ' Հայաստանում էլ նորմալ ֆուտբոլիստներ կան: Այնուհետեւ նա պատմեց, որ պատահաբար հեռուստացույցով տեսել է Հայաստան-Իտալիա խաղը, որի ժամանակ խիստ տպավորվել է մեր հավաքականի խաղով, սակայն այն ժամանակ չէր պատկերացնում, որ կլինի այդ թիմի գլխավոր մարզիչը: Հայաստանի ֆուտբոլի առաջնության մասին էլ նոր մարզիչնը իր դիտարկումները ներկայացրեց' նշելով, որ այնտեղ պակասում է խաղային տեմպը, իսկ մնացած առումներով վատ առաջնություն չէ:

Ի դեպ, Բեռնար Շալանդը նշեց, որ հայերեն չի սովորելու' դրա համար ժամանակ չունի ու իր ժամանակը ամբողջությամբ պատրաստվում է  տրամադրել ֆուտբոլին, իսկ ֆուտբոլիստների հետ խոսելու է մի լեզվով' ֆուտբոլային: Իսկ եթե առանձին մարզիկների հետ անձնապես շփվելու խնդիր ունենա, կդիմի թարգմանչի ծառայությանը: