Թեև մանկապիղծ լինելը հերքել է, բայց....

«Հայ ընտանիքը տղա երեխա է ունենում, պահում, մեծացնում, սակայն հայտնվում է ինչ-որ Սերոբ Տեր-Պողոսյան եւ պղծում է նրան»,- այսօր լրագրողների հետ հանդիպման ժամանակ ասաց «Երեխաների թրաֆիքինգի կանխարգելումը Հայաստանում» ծրագրի ղեկավար Տաթևիկ Բեժանյանը:

Խոսքը «Հետք» շաբաթաթերթում հրապարկված այն նյութի մասին է, ըստ որի` ՀՀ վարչապետի նախկին խորհրդական, «Մեթըլ Փրինս» ընկերության սեփականատեր, ԱՄՆ քաղաքացի Սերոբ Տեր-Պողոսյանը Ախթալայում անապահով ընտանիքների երեխաներին փողով իր կողմն է գրավում եւ պղծում նրանց:

Տաթեւիկ Բեժանյանն ասաց, թե նրա մանկապիղծ լինելու մասին վաղուց էր լսել, եւ թերթում հրապարակվածը դեռ շրջանառվող լուրերի մի մասն է միայն: Բոլոր ախթալացիները ճանաչում են զոհ դարձած երեխաներին, գիտեն, թե ինչքան գումար է վճարում մանկապիղծը եւ այլն:  Այս ամենը հայտնի է նաեւ տեղի ոստիկանությանը:

Սակայն «Ազատություն» ռադիոկայանին տված հարցազրույցում Սերոբ Տեր-Պողոսյանը հերքել է իր դեմ հնչեցված մեղադրանքները: Նա ասել է, թե այդպիսով փորձում են արատավորել իր ու իր կնոջ բարի համբավը: Առանց անուններ նշելու ասել է, թե Ախթալայում իրեն նախանձողներ կան, որ շարունակ վատություն են ուզում իրենց անել, բայց ինքը, այս ամենին հակառակ, միշտ էլ օգնել է ախթալացիներին ու կշարունակի օգնել:

Իսկ Լոռու մարզի դատախազ Կարեն Շահբազյանն ասաց, որ իրավապահները Տեր-Պողոսյանի` մանկապղծությունն ապացուցող տեսագրություն չեն ստացել` չնայած վերոհիշյալ հոդվածում արված պնդումներին: Դատախազը նշեց նաեւ, թե իրենք այս մասին հաղորդում էլ չեն ստացել:

Չնայած այս ամենին` լուրեր են շրջանառվում, թե վերջին շրջանում ախթալացի դեռահասներից ում ձեռքին փող էր հայտնվում, մյուսները հարցնում էին «Սերո՞բն է տվել»: