Էրդողանը նորից պահանջել է քանդել Կարսի արձանը

Թուրքիայի վարչապետ Ռեջեփ Թայիփ Էրդողանը նորից պահանջել է քանդել հայ–թուրքական բարեկամությանը նվիրված Կարսի արձանը։

«Ես «հրեշավոր» արտահայտությունը գործածել եմ հենց այդ արձանի համար։ Այն վայրում, որտեղ կանգնեցված է արձանը, պատմական արժեքներ կան։ Ինձ արձանի բովանդակությունն ընդհանրապես չի հետաքրքրում, եւ շատ քիչ բան գիտեմ, թե իրենից ինչ է ներկայացնում այդ արձանը»,– Hurriyet-ին տված հարցազրույցում հայտարարել է Թուրքիայի վարչապետը։

«Իշխանության գալուց ի վեր՝ մենք սկսեցինք մաքրել այդ տարածքը, ինչի արդյունքում ի հայտ եկան Սեյիդ Հասան էլ Հարաքանիի դամբարանն ու մզկիթը։ Իսկ մզկիթի գմբեթի եւ այն բլրի բարձրությունը, որի վրա գտնվում է այդ արձանը, գրեթե հավասար են։ Մենք թույլ չենք տա, որպեսզի որեւէ արձան ստվեր նետի պատմական արժեքի վրա»,– ասել է Էրդողանը՝ ավելացնելով, որ ինքն արձանի տեղադրման հետ կապված նախապես զգուշացրել էր Կարսի քաղաքապետին։