Երեկվա ուժեղ քամու հետեւանքով վարդենիսցիները զրկվել են գազից եւ էլեկտրաէներգիայից

Երեկ ուժեղ քամու հետևանքով զգալի վնասներ են կրել Գեղարքունիքի մարզի Վարդենիս քաղաքի բնակիչները: Yerkir.am-ի հետ զրույցում Գեղարքունիքի մարզպետ Ռաֆիկ Գրիգորյանը նշեց, որ հողմային փոթորիկը մեծ վնասներ է հասցրել տասնյակ քաղաքացիների բնակարաններին, քամին քշել-տարել է սեփական հատվածի տների տանիքները, 5 բարձրավոլտ էլեկտրական սյուն տապալել գետնին: Էլեկտրական սյուների տապալման հետևանքով բնակիչները երեկվանից չեն ունեցել գազ և էլեկտրաէներգիա:

Մարզպետի խոսքով` ամբողջ գիշեր աշխատանքներ են տարվել, էլեկտրական սյուները վերականգնվել են, և մինչև երեկո, հավանաբար, կվերականգնվի բոլոր բնակիչների գազի ու էլեկտրաէներգիայի մատակարարումը:

«Ինչ վերաբերում է բնակչությանը հասցված վնասին, այս պահի դրությամբ աշխատանքներ է տանում իմ կողմից ստեղծված հանձնաժողովը` մարզպետարանի, արտակարգ իրավիճակների փորձագետներից կազմված, երկու խումբ աշխատում է: Այսօրվա ընթացքում կուսումնասիրեն վնասի չափը, որը ես կներկայացնեմ կառավարությանը: Հաստատ, մենք աջակցություն կցուցաբերենք տուժած քաղաքացիներին»,- ասաց մարզպետը:

Անդրադառնալով քամուց ֆիզիկապես տուժած քաղաքացիներին` մարզպետը նշեց, որ թեթև վնասվածնքերի մասին է խոսքը, նրանց առաջին բուժօգնությունն արդեն ցուցաբերվել է: «Փառք Աստծո, որ մարդկային զոհեր չունեցանք»,- ասաց Գեղարքունիքի մարզպետը: