Իրանը կորցնո՞ւմ է Հայաստանի հանդեպ իր հետաքրքրությունը․ Ռոբերտ Մարգարյան

Քաղաքագետ Ռոբերտ Մարգարյանը գրում է․

«Իրանական «Սիասաթե մելլի» («Ազգային քաղաքականություն») թելեգրամյան ալիքը երեկ խստորեն քննադատել է Կապանում ԻԻՀ նոր գլխավոր հյուպատոսի նշանակումը:

Ըստ հիշյալ ալիքի տեղեկության ռազմավարական մեծ նշանակություն ունեցող Կապանում ԻԻՀ-ի գլխավոր հյուպատոսի պաշտոնում Մորթեզա Աբեդինին փոխարինելու է Յաիչի անվամբ թրքախոս մի անձ, որը չունի դիվանագիտական որևէ անցյալ ու մինչև այդ պաշտոնին նշանակվելն ԻԻՀ ԱԳ նախարարությունում հաշվապահ է աշխատել:

Այս նշանակումը տեղի է ունենում այն պայմաններում երբ ընդամենը մի քանի շաբաթ առաջ Իրանը նոր դեսպան նշանակեց Երևանում:

ՀՀ-ում ԻԻՀ-ի դեսպանի պաշտոնում հմուտ ու փորձառու դիվանագետ Մեհդի Սոբհանիին փոխարինեց ԻԻՀ ԱԳ նախարարության Քաղաքական ու միջազգային ուսումնասիրությունների կենտրոնի հետազոտական հարցերով տեղակալ Խալիլ Շիրղոլամին: Սա Շիրղոլամիի զբաղեցրած առաջին դիվանագիտական պաշտոնն է:

Նման մակարդակի նշանակումներ կատարվում են այն պայմաններում երբ կարևորելով Հայաստանի դերակատարությունն ու երկու ժողովուրդների հազարամյա բարեկամությունն Իրանը միշտ էլ իր ամենափորձառու ու հմուտ դիվանագետներին է գործուղել Հայաստան:

Կապանում Իրանի գլխավոր հյուպատոսի պաշտոնում նման փորձառությամբ անձի նշանակումը կարևոր է հատկապես այն առումով որ օգոստոսի 9-ից հետո Սյունիքի կապակցությամբ իրանական պաշտոնական հայտարարություններում նույնպես ուշագրավ փոփոխություն է նկատվում:

Փաստորեն նիկոլի վարած արտաքին «փայլուն» դիվանագիտության արդյունքում այսօր Հայաստանը գնալով կորցնում է հազարամյա հարևանի ու բարեկամ երկրի համար իր կարևորությունն այն աստիճանի որ հաշվապահին Կապանում գլխավոր հյուպատոս են նշանակում:

Անկախ նրանից թե այս օրերին Իրանում ստեղծված իրավիճակն ինչպիսի եզրահանգում կունենա Իրանը եղել է ու պիտի շարունակի մնալ մեր բարեկամը»: