Լիդյա Մանթաշյանի կալանքի վերացումը ոչ թե իշխանությունների գթասրտության դրսևորումն է, այլ հանրային ճնշման արդյունք է․ Արթուր Խաչատրյան

ՀՅԴ անդամ, «Հայաստան» խմբակցության պատգամավոր Արթուր Խաչատրյանը գրում է.

«Լիդյա Մանթաշյանի կալանքի, որպես խափանման միջոց, վերացումը ոչ թե իշխանությունների գթասրտության դրսևորումն է, այլ հանրային ճնշման արդյունք է: Քաղաքացիների մասնակցությունը դատական նիստերին, հրապարակային բողոքի ակցիաները, նախորդ շաբաթվա երթը, երեկվա խորհրդարանական լսումները, միջազգային հանդիպումներում միակ կին կալանավորի հարցի բարձրացումը, սոցիալական հարթակներում գրառումները և իհարկե փաստաբանների վիրտուոզ աշխատանքը ջրի կաթիլների նման քար ծակեցին:

Սա չեմ գրում Լիդյայի համախոհների համար, չեմ գրում նրա հակառակորդների համար (այստեղ ամեն ինչ պարզ է): Գրում եմ նրանց համար, ովքեր չէին հավատում, ովքեր կարծում են, թե ամեն ինչ անհույս է, որևէ բան անել հնարավոր չէ: Եթե դուք Թովմաս Թերահավատից ավելի թերահավատ եք, կարդացեք դատարանի այսօրվա որոշումը: Թեկուզ շա՜տ փոքր, բայց արդյունք է, չէ՞...»։

Ավելի վաղ հայտնել էինք, որ «Սրբազան պայքարի» գործով արդեն 5 ամիս անազատության մեջ գտնվող Լիդիա Մանթաշյանի կալանքը վերացվել է։ Նրա նկատմամբ որպես խափանման միջոց կիրառվել է վարչական հսկողություն և գրավ 2 միլիոն 500 հազար դրամի չափով: