Զորակցություն ենք հայտնում կալանքի մեջ գտնվող հոգևորականներին և բոլոր քաղբանտարկյալներին․ Ռումինիայի Հայոց թեմ

Ռումինիայի Հայոց թեմի հայտարարություն է տարածել, որը ներկայացնում ենք ստորև.

«Վրդովված սրտով ենք հետևում Հայրենի մեր երկրում իրադարձությունների անցանկալի, ամոթալի, բայց նաև կանխատեսելի զարգացումներին: Մեր Սուրբ Եկեղեցու դեմ նախաձեռնված արշավը գրավում է նորանոր ամոթալի բարձունքներ՝ խախտելով օրինականության պահանջները, անցնելով նաև ազգային մեր կյանքում գործող չգրված օրենքների և բարոյականության բոլոր սահմանները:

Մեզ համար խորապես մտահոգիչ է ականատեսը լինել Ժողովրդավարական բարեփոխումների հայտ ներկայացրած ՀՀ իշխանությունների կողմից՝ տարվույս հոկտեմբեր 15-ին Արագածոտնի թեմի առաջնորդ Գերշ. Տ. Մկրտիչ եպս. Պռոշյանի և թեմի քահանաների նկատմամբ անհամաչափ, անպատշաճ և թատերականացված ուժի կիրառմանը: Հայոց Եկեղեցու հոգևորականների դեմ հարուցված քրեական գործերն ու դատավարության ընթացքը բազմաթիվ տագնապներ և հարցեր են հարուցում թե՛ իրենց աննախադեպությամբ և թե՛ դրանց ընթացքի արդարության և թափանցիկության առումով:

Այս դժվարին օրերին մենք միասնաբար կանգնած ենք Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողքին, մեր հոգևոր եղբայրների և մեր հավատացելոց կողքին, զորացնելու մեր Եկեղեցու առաքելությունը, հեռու վանելու մեզանից ամեն պառակտում և ամրապնդելու սերն ու միաբանությունը՝ ի շահ մեր ազգի և պետականության:

Կոչ ենք անում Հայաստանի Հանրապետության իշխանություններին՝ առաջնորդվելու արդարության, թափանցիկության և օրինականության սկզբունքներով և հանձնառությամբ՝ հանդեպ հավատքի ու հայրենասիրության այն անխախտ արժեքները, որոնք դարեր շարունակ ամրացրել ու պահպանել են մեր Ժողովրդին:

Խստորեն դատապարտում ենք ՀՀ իշխանությունների նման գործելակերպը և մեր աղոթքն ու եղբայրական զորակցությունը հայտնում Արագածոտնի բարեջան առաջնորդ Գերշ. Տ. Մկրտիչ եպս. Պռոշյանին և թեմի քահանայից դասին, ինչպես նաև ամիսներ շարունակ կալանքի մեջ գտնվող Գերշ․ Տ․ Միքայել արք․ Աջապահյանին, Գերշ․ Տ․ Բագրատ արք․ Գալստանյանին և բոլոր քաղբանտարկյալներին՝ վերստին հորդորելով. «Հույսով ուրախացեք, նեղության համբերեցեք, հաճախակի աղոթեցեք» (Հռոմ 12:12)»։