Հունգարիան դուրս է գալիս Միջազգային քրեական դատարանից

Հունգարիայի խորհրդարանը կողմ է քվեարկել երկիրը Միջազգային քրեական դատարանից (ՄՔԴ) դուրս բերելու օգտին: Այս մասին երեքշաբթի՝ մայիսի 20-ին, հայտնել է Telex-ը։

ՄՔԴ-ից Հունգարիայի դուրս գալու վերաբերյալ վերջնական որոշումը պաշտպանել է 134 պատգամավոր, դեմ է արտահայտվել 37, ձեռնպահ՝ 7 օրենսդիր։

Արտաքին գործերի և առևտրի նախարար Պիտեր Սիյարտոն ասել է, որ կառավարությունը մոտ ապագայում կտեղեկացնի ՄԱԿ-ի գլխավոր քարտուղարին որոշման մասին։ Նա ասել է, որ ՄՔԴ-ն վիճահարույց կառույց է դարձել վերջին շրջանում, քանի որ դատավորները «անիմաստ բաներ են արել», օրինակ՝ ՀԱՄԱՍ-ի մահացած առաջնորդների  և Իսրայելի վարչապետ Բենիամին Նեթանյահուի ձերբակալության օրդերներ տալը:

Սիյարտոն կարծում է, որ ՄՔԴ-ն այսպիսով դարձել է քաղաքական դրդապատճառներով առաջնորդվող կազմակերպություն, և Հունգարիայի կառավարության համար անընդունելի է, որ «դատարանի աշխատանքը քաղաքականությամբ պայմանավորված է»:

«Մենք չենք կապելու մեր անունը դատարանի նման անլուրջ և քաղաքական դրդապատճառներով գործունեության հետ, այդ իսկ պատճառով մենք առաջարկություն ենք ներկայացրել խորհրդարան, որպեսզի Հունգարիան դուրս գա ՄՔԴ-ից»,- ասել է նախարարը։

Ապրիլի 3-ին Հունգարիան հայտարարել էր ՄՔԴ-ից դուրս գալու մասին։ Հայտարարությունը հնչել էր այն օրը, երբ Իսրայելի վարչապետ Բենիամին Նեթանյահուն ժամանել էր Բուդապեշտ՝ չնայած ձերբակալության միջազգային օրդերին:

ՄՔԴ-ի ղեկավար մարմինն ասել էր, որ Հունգարիայի որոշումը «անհանգստացնող է»: