Արտահանման ճգնաժամը կամ ինչո՞վ են զբաղված էկոնոմիկայի փոխնախարարն ու գինեգործության հիմնադրամի տնօրենը վերջին 20 օրերին

Շուրջ մեկ ամիս Վրաստանում խնդիրներ են առաջացել հայկական ալկոհոլային խմիչքների արտահանման հետ կապված: Արտադրողների տասնյակ մեքենաներ կանգնած են Վրաստանում առանց որևէ բացատրության. ինչ-որ նմուշառում են անում խմիչքներից՝ այն դեպքում, երբ տվյալ ապրանքը Վրաստանում չի վաճառվելու, այլ ընդամենը անցնելու է այդ երկրով:

Yerkir.am-ը պաշտոնական կայքերից ու բաց աղբյուրներից փորձեց պարզել, թե ինչո՞վ են զբաղվել ոլորտի պատասխանատուները՝ էկոնոմիկայի նախարարի տեղակալ Արման Խոջոյանը և Խաղողագործության և գինեգործության հիմնադրամի տնօրեն Զարուհի Մուրադյանը վերջին 20 օրերին:

Դե, ՍԱՏՄ ղեկավարության մասին խոսելն ուղղակի ավելորդ է, քանի որ վերջինիս ղեկավար Արմեն Դանիելյանն օրեր առաջ նախ ազատվել էր աշխատանքից, ապա ձերբակալվել:

Այսպես, Արման Խոջոյանը ապրիլի 27-ին Քաղաքացու օրվա առթիվ հանդիպում է ունեցել Վաղարշապատ համայնքի երիտասարդների հետ։

Խոջոյանի հաջորդ աշխատանքը եղել է մայիսի 3-ին։ Նա մասնակցել է համապետական շաբաթօրյակին:

Զարուհի Մուրադյանը մայիսի 6-ին աշխատավայրում տոնել է ծննդյան օրը: Ի դեպ տեսանյութն այս պահին հեռացված է հիմնադրամի էջից:

Այնուհետև, մայիսի 8-ին Մուրադյանն ու Խոջոյանը պրոդյուսեր Արթուր Ջանիբեկյանի հետ մասնակցել են մի ծրագրի գործընկերային ընթրիքի:

Ահա այսիպիսին է ոլորտի պաշտոնյաների վերջին 20 օրերի օրակարգը: 

Իսկ հայրենական խմիչք արտադրողները, որպես հարկատու-հերոսներ, խնդիրների լուծումը իրենց ուժերով փնտրում են հարևան պետության դեսպանատան առջև՝ որբի նման սպասելով, թե երբ են  ՀՀ-ում Վրաստանի դեսպանատանն իրենց բարեհաճելու ընդունեն և մի հուսադրող բան ասեն։

Արտադրողների՝ Վրաստանի դեսպանատան առջև նախաձեռնած բողոքի ակցիան կարող եք դիտել՝ այստեղ։