Սերբիայում մարտի 18-ը սգո օր կհայտարարվի՝ Հյուսիսային Մակեդոնիայում մահաբեր հրդեհի պատճառով

Վաղվա նիստում Սերբիայի կառավարությունը, երկրի նախագահ Ալեքսանդր Վուչիչի առաջարկով, երեքշաբթի օրը՝ մարտի 18-ը, Սերբիայում սգո օր կհայտարարի Հյուսիսային Մակեդոնիայում տեղի ունեցած ողբերգության պատճառով, հայտնում է Tanjug-ը՝ հղում անելով Սերբիայի կառավարության ԶԼՄ-ների հետ համագործակցության վարչությանը։

Երկրի վարչապետ Միլոշ Վուչևիչը և նախագահ Վուչիչն այսօր առավոտյան քննարկել են Հյուսիսային Մակեդոնիայի Կոչանի քաղաքում տեղի ունեցած ողբերգությունը, որտեղ դիսկոտեկում բռնկված հրդեհի հետևանքով մեծ թվով քաղաքացիներ են զոհվել։ Որոշվել է մարտի 18-ը Սերբիայի Հանրապետությունում սգո օր  հայտարարել, ասվում է հայտարարության մեջ։

Հյուսիսային Մակեդոնիայի ներքին գործերի նախարար Պանչե Տոշկովսկու հրապարակած վերջին տվյալների համաձայն, Կոչանիի «Պուլս» գիշերային ակումբում այսօր առավոտյան ժամը երեքին համերգի ժամանակ բռնկված հրդեհի հետևանքով զոհվել է 51 մարդ, վիրավորվել՝ ավելի քան 100-ը։

Տեղական ԶԼՄ-ների տվյալներով, հրդեհի պատճառ է դարձել գիշերային ակումբի շենքի ներսում հրավառության կազմակերպումը։