Լաթաքիայում վերսկսվել են բախումները Սիրիայի անվտանգության ուժերի և Ասադի կողմնակիցների միջև

Սիրիայի նոր իշխանություններին ենթարկվող անվտանգության ուժերի և նախկին նախագահ Բաշար Ասադի զինված կողմնակիցների միջև Լաթաքիա նահանգում վերսկսվել են բախումները։ Այս մասին հայտնում է ՏԱՍՍ–ը` վկայակոչելով Al-Ikhbaria հեռուստաալիքը։

Լրատվամիջոցի տեղեկություններով` հանրային անվտանգության վարչությունը լրացուցիչ ուժեր է ուղարկել Էլ Կադմուս քաղաքի տարածք, որը տեղակայված է Տարտուս նահանգում։ Նշվում է, որ դա արվել է տարածաշրջանում անվտանգության պահպանման, կայունության բարձրացման և հանգստության վերականգնման նպատակով։

Մարտի 6-ից Սիրիայի Ջեբլա քաղաքում, Լաթաքիայի մի քանի թաղամասում և Լաթաքիա ու Տարտուս նահանգների լեռնային հատվածներում կատաղի մարտեր են բռնկվել սիրիական անվտանգության ուժերի և Դամասկոսում նոր իշխանության դեմ հանդես եկող զինված կազմավորումների միջև:

Սիրիայի կենտրոնական իշխանություններn ուժեր են ուղարկել տարածաշրջան։ Այն բանից հետո, երբ առափնյա հատվածի բնակավայրերի նկատմամբ վերականգնվել է կենտրոնական իշխանության վերահսկողությունը, սկսել են հաղորդագրություններ ստացվել ալևիների զանգվածային մահապատիժների մասին։ Խոսվում է հարյուրավոր սպանվածների, այդ թվում՝ կանանց և երեխաների մասին։

Սոցցանցերում տասնյակ տեսանյութեր են հայտնվել, որտեղ երևում են քաղաքացիական անձանց նկատմամբ ուժայինների կողմից իրականացվող կտտանքներն ու մահապատիժները։

Հիշեցնենք՝ Սիրիական Լաթաքիայում 2 հայ է սպանվել: