Ռուսական զորքը գրավել է Տերնի և Նեսկուչնոյե բնակավայրերը

Ռուսաստանի զինված ուժերը վերահսկողության տակ են վերցրել ԴԺՀ-ի Տերնի և Նեսկուչնոյե բնակավայրերը, երեքշաբթի հայտնել է ՌԴ պաշտպանության նախարարությունը։

«Արևմուտք» ուժերի խմբավորման ստորաբաժանումների վճռական գործողությունների արդյունքում ազատագրվել է Դոնեցկի Ժողովրդական Հանրապետության Տերնի բնակավայրը»,- ասվում է հաղորդագրության մեջ։

Գերատեսչության տվյալներով՝ «Արևելք» ուժերի խմբավորման ստորաբաժանումները շարունակել են առաջխաղացումը հակառակորդի պաշտպանության խորքերում և ազատագրել Դոնեցկի Ժողովրդական Հանրապետության Նեսկուչնոյե բնակավայրը։

Ռուս զինվորականներն աստիճանաբար վերահսկողություն են սահմանում ԴԺՀ-ի և Զապորոժիեի շրջանի սահմանների հանգույցում գտնվող ագլոմերացիայի վրա, հայտնում է ՌԴ պաշտպանության նախարարությունը։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։