Հութիները հայտարարել են, որ հարվածել են Իսրայելի պաշտպանության նախարարությանը

Եմենի հյուսիսում իշխող շիական «Անսար Ալլահ» (հութիներ) շարժումը հայտարարել է, որ «Պաղեստին-2» գերձայնային բալիստիկ հրթիռ է արձակվել Թել Ավիվում Իսրայելի պաշտպանության նախարարության ուղղությամբ։

Ըստ հութիների զինված ուժերի հայտարարության` սա իսրայելական օբյեկտների վրա երրորդ հարձակումն է վերջին 12 ժամվա ընթացքում։

«Մենք ռազմական գործողություն ենք իրականացրել թշնամու պաշտպանության նախարարության դեմ օկուպացված Յաֆֆայում (Թել Ավիվ)՝ օգտագործելով «Պաղեստին-2» գերձայնային բալիստիկ հրթիռ: Հրթիռը հասել է թիրախին, որսացող համակարգերը չեն կարողացել կանգնեցնել այն», - պնդում են հութիները։

Երեկ երեկոյան շարժումը հայտարարել էր, որ Թել Ավիվում մի քանի կարևոր թիրախ է խոցվել։

Ավելի վաղ ԶԼՄ-ները հայտնել էին, որ ԱՄՆ-ն և Մեծ Բրիտանիան ավիահարվածներ են հասցրել Եմենի հութիների օբյեկտներին ապստամբների կողմից վերահսկվող Սանայում։

Հիշեցնենք` Եմենի հյուսիսում իշխող «Անսար Ալլա» շարժումը, որը վերահսկում է Կարմիր ծովի եմենյան ափերի մեծ մասը, Գազայի հատվածում հակամարտության սրումից հետո զգուշացրեց, որ կհարձակվի Իսրայելի հետ կապ ունեցող ցանկացած նավի վրա, և մյուս երկրներին հորդորեց հետ կանչել իրենց անձնակազմերը։