Հութիները հայտարարել են Թել Ավիվի օդանավակայանի վրա հիպերձայնային հրթիռային հարձակման մասին

Հութիների և Իսրայելի միջև լարվածությունը վերջին շաբաթներին կտրուկ աճել է: Եմենի հյուսիսում իշխող շիա ռազմաքաղաքական շարժումն իր Telegram ալիքում հայտարարել է, որ հրթիռային հարձակում է գործել Թել Ավիվի Բեն Գուրիոն օդանավակայանի վրա՝ ի պատասխան Իսրայելի կողմից Սանայում և Հոդեյդա նահանգի միջազգային օդանավակայանի ռմբակոծմանը։ 

«Մենք հարձակում ենք իրականացրել Բեն Գուրիոնի օդանավակայանի վրա՝ օգտագործելով Palestine 2 հիպերձայնային բալիստիկ հրթիռը», - ասվում է հրատարակության մեջ։

Եմենի զինված ուժերի խոսնակն ընդգծել է, որ իսրայելական հարձակումները Սանայում և Հոդեյդայում քաղաքացիական օբյեկտների վրա կամրապնդեն Եմենի ժողովրդի վճռականությունը՝ աջակցելու պաղեստինցիներին, և վստահեցրել է, որ հութիները կկարողանան ընդլայնել իրենց թիրախների բազան Պաղեստինում՝ ներառելով իսրայելական ամենակարևոր թիրախները։

Բացի այդ, հութիները հայտարարել են, որ ևս մեկ հարված են հասցրել անօդաչու թռչող սարքերի կիրառմամբ ՝ Թել Ավիվում «կենսական նշանակության թիրախին»։ Նրանք պնդում են, որ թիրախը բարեհաջող խոցվել է։

Նախօրեին իսրայելական կործանիչները գրոհել են Սանայի օդանավակայանը, Սանայում և Հոդեյդայում գտնվող էլեկտրակայանները, Եմենի արևմտյան նավահանգիստները, ինչի հետևանքով, ըստ վերջին տվյալների, զոհվել է վեց մարդ, վիրավորվել՝ 40-ը։

Հութիները գրեթե ամեն օր սկսել են հրթիռներով և անօդաչու թռչող սարքերով գրոհել հրեական պետության տարածքը՝ սպառնալով համաչափ պատասխան տալ ցանկացած ռմբակոծության: Իսրայելն իր հերթին հարվածներ է հասցնում Եմենի թիրախներին: