Ռուսաստանն աջակցում է Օրբանի՝ Ուկրաինայում խաղաղության հաստատմանն ուղղված ջանքերին

Ուկրաինայում խաղաղության հաստատման շուրջ խորհրդակցությունները կշարունակվեն, Մոսկվան աջակցում է Հունգարիայի վարչապետ Վիկտոր Օրբանի ջանքերին՝ ուղղված խաղաղ կարգավորման և գերիների փոխանակման հետ կապված մարդասիրական խնդիրների լուծմանը, ասել է ՌԴ նախագահի մամուլի քարտուղար Դմիտրի Պեսկովը։

«Մենք ենթադրում ենք, որ խաղաղության հաստատման շուրջ խորհրդակցությունները կշարունակվեն։ Ռուսական կողմը լիովին աջակցում է Օրբանի ջանքերին՝ ուղղված խաղաղ կարգավորմանը և գերիների փոխանակման հետ կապված մարդասիրական խնդիրների լուծմանը»,- լրագրողներին ասել է Պեսկովը։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։