ԱՄՆ պետդեպը ողջունել է կոնգրեսականների՝ ԼՂՀ-ում խաղաղության հաստատմանն ուղղված առաջարկներ

ԱՄՆ-ի Հայ դատի հանձնախումբը տեղեկացրել է, որ ԱՄՆ պետդեպարտամենտը ողջունել է ԱՄՆ-ի Կոնգրեսի Ներկայացուցիչների պալատի Արտաքին հարցերի հանձնաժողովի նախագահ Էդ Ռոյսի, բարձրաստիճան դեմոկրատ կոնգրեսական Էլիոթ Էնգելի, ինչպես նաև նրանց 80 կոնգրեսականների՝ ղարաբաղա-ադրբեջանական շփման գծում լարվածության ու ագրեսիայի թուլացմանը վերաբերյալ առաջարկները։

Asbarez-ի տեղեկացմամբ՝ Ռոյսի և Էնգելի նախաձեռնությամբ ներկայացված առաջարկները Պետդեպի կողմից ընդունվում են այն ժամանակ, որի ընթացքում շփման գծում Ադրբեջանի կրակոցներից զոհ է դարձել 40 հայ զինծառայող։

Հիշեցնենք, որ Ներկայացուցիչների պալատի անդամներ Ադամ Շիֆը, Էդ Ռոյսն ու Էլիթ Էնգլը դիմել էին ԱՄՆ պետքարտուղարությանը և ԵԱՀԿ Մինսկի խմբի ամերիկացի համանախագահ Ջեյմս Ուորլիքին՝ պահանջելով հայ-ադրբեջանական սահմանին և ԼՂՀ ու Ադրբեջանի զինված ուժերի շփման գծում զինադադարի խախտումներին արձագանքելիս «արհեստական հավասարություն» չդնել հայկական և ադրբեջանական կողմերի գործողությունների միջև:

Ռոյսն ու Էնգլը նաև սկսել էին ստորորագրություն հավաքել այլ կոնգրեսականներից՝ նույն նպատակով Ուորլիքին նամակ ուղղելու համար: Ուորլիքն իր հերթին աջակցություն էր հայտնել հայ-ադրբեջանական շփման գծից դիպուկահարներին հեռացնելու՝ կոնգրեսականների կոչին: