Ֆիդանն ու Բլինկենը քննարկել են Սիրիայում տիրող իրավիճակը

Թուրքիայի արտգործնախարար Հաքան Ֆիդանը ԱՄՆ պետքարտուղար Անտոնի Բլինկենի հետ քննարկել է Սիրիայում վերջին իրավիճակը և կոչ  արել կառուցողական դեր խաղալ տարածաշրջանի բոլոր խաղացողների համար, գրում է РИА Новости-ն։

«Դեկտեմբերի 6-ին Հաքան Ֆիդանը հեռախոսազրույց է ունեցել Էնթոնի Բլինքենի հետ։ Զրույցի ընթացքում քննարկվել են Սիրիայի վերջին իրադարձությունները։ Ֆիդանը կարևորել է նախկին սխալները չկրկնելը և ասել, որ ռեժիմը պետք է իրատեսորեն գործի, երկխոսություն սկսի ընդդիմության հետ և սկսի քաղաքական գործընթացը։ Նա ընդգծել է, որ տարածաշրջանի բոլոր խաղացողները պետք է կառուցողական դեր ունենան այս ուղղությամբ», - ասել է գործակալության զրուցակիցը։

Հիշեցնենք՝ նոյեմբերի 27-ին «Ջեբհաթ ան Նուսրա»-ի զինյալները խախտել են հրադադարի մասին համաձայնագիրը և գրոհել Սիրիայի Հալեպ և Իդլիբ Նահանգների վրա: Սիրիական բանակին աջակցում են Ռուսաստանի օդատիեզերական ուժերը՝ հարվածներ հասցնելով ահաբեկիչների տեխնիկային, կառավարման կետերին, պահեստներին և հրետանային դիրքերին։ Նոյեմբերի 30-ին հայտնի դարձավ, որ թուրքամետ արմատական խմբավորումները գիշերվա ընթացքում գրեթե ամբողջությամբ գրավել են Սիրիայի Հալեպ քաղաքը, իսկ Հալեպի գլխավոր հյուպատոսությունն ու Հայկական մարդասիրական առաքելությունը տարհանվել են։ Դեկտեմբերի 5-ի երեկոյան հայտնի դարձավ, որ հակակառավարական ուժերը գրավել են Սիրիայի կենտրոնական Համա քաղաքը և էլ ավելի մոտեցել Հոմսին և մայրաքաղաք Դամասկոսին: