Պուտինն ու Էրդողանը քննարկել են Ուկրաինայում եւ Սիրիայում տիրող իրավիճակը

Ռուսաստանի եւ Թուրքիայի նախագահներ Վլադիմիր Պուտինը եւ Ռեջեփ Թայիփ Էրդողանը հեռախոսով քննարկել են Ուկրաինայում եւ Սիրիայում տիրող իրավիճակը։

Կրեմլի մամուլի ծառայության փոխանցմամբ, մասնավորապես, թուրքական կողմի նախաձեռնությամբ եւ, հաշվի առնելով Անկարայում Ռուսաստանի եւ Ուկրաինայի մարդու իրավունքների հանձնակատարների վերջին շփումները,  բարձրացվել է գերիների, առաջին հերթին վիրավորների փոխանակման հարցը։ «Վլադիմիր Պուտինը ուշադրություն է հրավիրել Կիեւի ռեժիմի կործանարար գծի վրա, որը խաղադրույք է կատարում արեւմտյան հովանավորների աջակցությամբ ռազմական գործողությունների սրման, փոխանցվող զենքի եւ ռազմական տեխնիկայի ծավալների ավելացման վրա։ Կիեւի կեղծավոր քաղաքականության օրինակ էր ուղղափառ Սուրբ Ծննդյան տոների ընթացքում կրակը դադարեցնելու առաջարկի մերժումը։

Դիտարկվել է 2022 թվականի հուլիսի 22-ի ստամբուլյան «փաթեթային» համաձայնագրերի իրականացումը՝ սեւծովյան նավահանգիստներից ուկրաինական հացահատիկի արտահանման եւ Ռուսաստանից սննդամթերքի ու պարարտանյութերի մատակարարումների ապաշրջափակման վերաբերյալ։

Բացի այդ, քննարկվել են թուրք-սիրիական հարաբերությունների կարգավորման հարցեր, այդ թվում՝ Ռուսաստանի, Թուրքիայի եւ Սիրիայի ներկայացուցիչների մասնակցությամբ խորհրդակցություններ սկսելու Անկարայի նախաձեռնության համատեքստում։ Նշվել է նաեւ Ռուսաստանի, Թուրքիայի եւ Իրանի համատեղ աշխատանքի գործնական նշանակությունը՝ սիրիական կարգավորմանն օժանդակելու Աստանայի գործընթացի շրջանակներում։

Երկու երկրների ղեկավարները հաստատել են իրենց հանձնառությունը ռուս-թուրքական համագործակցության հետագա համակողմանի զարգացմանը։ Առաջնահերթությունների թվում է համագործակցությունը էներգետիկ ոլորտում, ներառյալ ռուսական բնական գազի մատակարարումները եւ Թուրքիայի տարածքում տարածաշրջանային գազային «հանգույցի» ստեղծումը։