«Ալիևն էթնիկ զտումներ է արել հայերի նկատմամբ». Գրետա Թունբերգը բողոքի ցույց է հրավիրել Թբիլիսիում

Դուրս եկեք ընդդեմ ավտորիտարիզմի, «կանաչ լվացման» (Greenwashing), պատերազմի և կապիտալիստական ​​շահագործման։

Դրա մասին սոցիալական ցանցերում գրել է շվեդ բնապահպան ակտիվիստ Գրետա Թունբերգը։

«Վայրը՝ Թբիլիսի, Ազատության հրապարակ, նոյեմբերի 11-ին, Թբիլիսիի ժամանակով՝ 19:00-ին։

Միացե՛ք մեզ։ Մենք դեմ ենք Կովկասը ողողած ավտորիտարիզմի և շահագործման ալիքին: Ադրբեջանն, օգտագործելով COP29-ը որպես ճակատամաս, խստացնում է կեղծ «կանաչ» օրակարգը, ուժեղացնում է իշխանությունը և սրում տարածաշրջանային լարվածությունը:

Ավելի քան 20 տարի Ալիևի գլխավորած ադրբեջանական վարչակարգը ճնշված է պահել մարդկանց՝ խրախուսելով աղքատությունը, վախն ու լռությունը։ Այս ավտորիտար միտումը մեկուսացված չէ. ամբողջ տարածաշրջանում այնպիսի մարդիկ, ինչպիսիք են Իվանիշվիլին, Պուտինը, Էրդողանը, Իրանի աստվածապետական ​​ռեժիմը մեծացնում են վերահսկողությունը, ճնշում են այլախոհությունը, ճնշում սեփական ժողովրդին և օգտագործում են պատերազմն ու էթնիկ զտումներ իրականացնում հայերի, ուկրաինացիների, քրդերի և այլ էթնիկական փոքրամասնությունների դեմ՝ արդարացնելու համար դաժան քաղաքականությունը։

Նրանք, ովքեր բարձրաձայնում են՝ լրագրողները, ակտիվիստները, գիտնականները, հաճախ ենթարկվում են ազատազրկման և բռնության: Այդ համակարգի շրջանակում կլիմայական գործողությունները հանգեցնում են կորպորատիվ շահույթ ստանալու սխեմաների՝ թողնելով մարդկանց կարիքները չբավարարված, իսկ համայնքները՝ աամայացված:

Արևմուտքի հավաքական դերն այս ավտորիտար տեղաշարժում անհերքելի է, քանի որ այն շարունակում է լեգիտիմացնել և ֆինանսավորել ռեպրեսիվ վարչակարգերը՝ հանուն էներգիայի և շահույթի: Ռեսուրսների դիմաց աչք փակելով ճնշումների վրա՝ արևմտյան տերությունները մեղսակից են դառնում այն ճնշումներին և տառապանքներին, որոնց բախվում են Կովկասի ժողովուրդները:

Կովկասյան ֆեմինիստական ​​հակապատերազմական շարժումը պահանջում է ավտորիտարիզմից, պատերազմից և կապիտալիստական ​​ագահության խեղդամահությունից զերծ ապագա: Մենք պաշտպանում ենք իսկական ազատությունը, հավասարությունը, արդարությունը և մի տարածաշրջան, որտեղ առաջին տեղում մարդիկ են, ոչ թե շահույթը»,- գրել է նա: