Իշխանությունների այն պնդումները, որ զիջումներով կարելի է խաղաղության հասնել, հավելյալ խոցելիություն է ստեղծել ՀՀ-ի համար. Աբրահամյան

Ադրբեջանական հռետորաբանությունը COP29-ին ընդառաջ բավականին սրվել է: Թե ինչով է դա պայմանավորված՝ պետք է դեռ մանրամասն ուսումնասիրել: Այս մասին գրել է ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը։

«Ընդ որում՝ թվում էր, թե որ Ադրբեջանը միջազգային խոշոր միջոցառումը պետք է օգտագործեր իր «խաղաղասիրական», «կառուցողական» դիրքորոշումները ներկայացնելու համար, սակայն ինչ-որ բան այն չէ:

Ալիևը, հատկապես վերջին շրջանում, ակտիվ քննադատում է միջազգային այն դերակատարներին, երկրներին, որոնք ինչ-որ կերպ աջակցում կամ սատարող հայտարարություններ են հնչեցնում Հայաստանի մասին, դեռ չեմ խոսում Հայաստանի դեմ իջեցվող նախապայմանների ու սպառնալիքների մասին:

Հայաստանյան իշխանությունների այն պնդումները, որ զիջումներով կարելի է խաղաղության հասնել, ոչ միայն մեզ չի մոտեցրել իրական խաղաղության, այլ հավելյալ խոցելիություն է ստեղծել Հայաստանի Հանրապետության համար»:

ՄԱԿ-ի Կլիմայի փոփոխության մասին շրջանակային կոնվենցիայի Մասնակիցների կոնֆերանսի 29-րդ նստաշրջանը («COP29») այս տարի անցկացվում է Ադրբեջանում։

Հիշեցնենք՝ աշխարհասփյուռ հայությունն այս օրերին համաժողովի մասնակիցներից պահանջում է ճնշում գործադրել ցեղասպան Ադրբեջանի վրա, որպեսզի վերջինս ազատ արձակի Արցախի ռազմաքաղաքական ղեկավարությանն ու Բաքվում ապօրինի պահվող անձանց, դադարեցնի հայկական մշակութային արժեքների ոչնչացումը Արցախում և ապահովի բռնագաղթված արցախահայության` հայրենիք վերադարձի իրավունքը։

Հայտնենք՝ Իրանի նախագահ Մասուդ Փեզեշքիանը, Գերմանիայի կանցլեր Օլաֆ Շոլցը, Նիդեռլանդների վարչապետ Դիկ Շոֆը հայտնել են, որ չեն մասնակցի COP29-ին։