Մետրոպոլիտենի մանիպուլյացիան՝ հերթ եք կանգնում, որովհետև զարգացած երկիր եք․ Սոնա Աղեկյան

«Մայր Հայաստան» դաշինքի անդամ Սոնա Աղեկյանն անդրադարձել է մետրոպոլիտենում տիրող այսօրվա պատկերին։ Նա մասնավորապես գրել է․

«Աշխարհում ընդունված է երկրի զարգացվածությունը որոշել տնտեսական աճով կամ կապիտալի շուկայի ընդլայնմամբ։ Բայց Երևանի մետրոպոլիտենի համար, փաստորեն, երկրի զարգացվածության բոլորովին այլ չափանիշ կա՝ ապաշնորհ կառավարման հետևանքով առաջացած հերթերը և ներդված նոր համակարգի անսարքությունը։

Ըստ այդ տրամաբանության՝ զարգացած երկիր համարվելու համար նաև պետք է հանձնվեն ինքնիշխան տարածքները, քաղաքական հետապնդումներ իրականացվեն, արտագաղթն աճի, տնտեսությունը գնա դեպի կործանում, օրեցօր աճի արտաքին պարտքը և այսպես շարունակ։

Մի խոսքով, Անասնաֆերմայի տրամաբանությամբ՝ ինչքան վատ, այնքան լավ։ Միայն թե այդ լավը սովորական քաղաքացիների վրա չի տարածվում»։