Ինչո՞ւ է Գնել Սանոսյանի մտերիմ-համագյուղացին լքել յուղալի պաշտոնն ու նավը

Լուր տարածվեց, որ «Ճանապարհային դեպարտամենտ» հիմնադրամի տնօրեն Գոռ Ավետիսյանն ու նրա տեղակալ Սերժիկ Պետրոսյանը ազատվել են աշխատանքից։

Փաստենք, որ Գոռ Ավետիսյանն ու ՀՀ տարածքային կառավարման և ենթակառուցվածքների նախարար Գնել Սանոսյանը համագյուղացիներ են՝ ՀՀ Գեղարքունիքի մարզի Ծակքար գյուղից, ընտանիքներով ունեն ջերմ հարաբերություններ, և, բնականաբար, Գոռ Ավետիսյանի կարիերայի աճին իր անմիջական նպաստն է բերել Գնել Սանոսյանը: Գնել Սանոսյանի՝ Գեղարքունիքի մարզպետ եղած ժամանակ հենց վերջինիս ջանքերով են Գոռ Ավետիսյանն ու Գնել Սանոսյանի կինը՝ Ռուզաննան, աշխատանքի անցել ՀՀ տարածքային կառավարման և ենթակառուցվածքների նախարարությունում՝ Սուրեն Պապիկյանի մոտ։

Այսպես, Տրանսպորտի, կապի և տեղեկատվական տեխնոլոգիաների նախարարության «Հայաստանի ավտոմոբիլային ճանապարհների տնօրինություն» ՊՈԱԿ-ի լուծարումից հետո Գոռ Ավետիսյանը, որը նշված ՊՈԱԿ-ի տնօրենն էր մինչ 2019 թ., 2020 թ. մայիսից հայտնվում է ՏԿԵ նախարարությունում՝ իբրև «Ճանապարհային դեպարտամենտ» ՊՈԱԿ-ի տնօրենի տեղակալ, հետո՝ նախարարի խորհրդական, իսկ Գնել Սանոսյանի նախարարության օրոք՝ 2022 թ. փետրվարին, նշանակվել է «Ճանապարհային դեպարտամենտ» հիմնադրամի գործադիր տնօրեն:

Բնականաբար, Գոռ Ավետիսյանը մոտ հարաբերություններ ունի նաև Սուրեն Պապիկյանի հետ, առանց որի երաշխավորության նա  չէր կարող նշանակվել այդչափ կարևոր հիմնադրամի տնօրենի պաշտոնին։

Տեսակետ կա, որ Գնել Սանոսյանի օրերը հաշված են, և Գոռ Ավետիսյանն արագ կողմնորոշվելով՝ լքել է նախարարի խորտակվող նավն ու փորձել իրեն ապահովագրել հնարավոր դատական գործընթացներին առնչվելու վտանգից: Լավատեղյակներն անգամ չեն բացառում, որ Գոռ Ավետիսյանն օրերս անհետանա երկրից, քանի որ բոլորը գիտեն, թե ինչպիսի յուղալի պաշտոնի է եղել նա, և ինչպիսի բացահայտումների մասին կարող է խոսք լինել: Տեղեկացանք նաև, որ այս օրերին ստուգումներ են իրականացվում Գնել Սանոսյանի նախարարությունում, և մութ ամպեր են կուտակվել նաև նախարարի վրա:

Վ. Սարգսյան