Եթե, արքաներից ենք խոսում, ես Արտաշես Ա-ի կերտած Հայաստանն եմ ուզում

Հայոց Արտաշես Ա արքան (Ք․ ա․ 189-160) ստեղծեց հզոր, միասնական, համակարգային հայկական պետություն։

• Միավորեց Մեծ Հայքի հայկական և հայաբնակ բոլոր տարածքները, բացառությամբ Ծոփքի։ Արտաշես Ա արքան աներկբայորեն հանդիսանում է հայկական հողերը միավորող պետական գործիչ։

• Հայկական բանակի համալրման, սոցիալական արդարության հաստատման և պահպանման նպատակով օրենսդրորեն պարտադրեց կամ խրախուսեց միջին խավի (մանր և միջին ագարակատերեր) գոյությունը։ Չուներ իր սրտի խոշոր ագարակատերը (օլիգարխը)։

• Չնայած որ նպաստել էր նախորդ իշխանութունների (Երվանդունիների) տապալմանը, ոչ միայն չմերժեց, ատելություն չտարածեց նրանց (նախկինների) հանդեպ, այլև իրեն համարեց նրանց ստեղծած հայկական պետականության շարունակողը։ Արտաշես Ա արքան չնայած բազմաթիվ իր կատարած նոր բաների, իրեն չհռչակեց Նոր Հայաստանի հիմնադիր։ Նա գիտակցում էր հայկական պետականության շարունակականության կարևորությունը։

• Արտաշես Ա-ը ստեղծեց պետական կառավարման ամուր համակարգ և հիմքեր ստեղծեց իր հաջորդների և հատկապես Տիգրան Բ-ի համար՝ ընդարձակելու Հայաստանի սահմանները։

• Արտաշես Ա-ին ժողովուրդը Բարեպաշտ պատվանունն էր տվել։

Հ․ Գ․ - Ի դեպ, Պապ թագավորը սեփական ոստիկանական գնդերի օգնությամբ հայկական հողեր չէր նվիրել թշնամուն։

Խաչատուր Ստեփանյան

ՀՅԴ Հայաստանի ԳՄ անդամ,

Պատմական գիտությունների դոկտոր, պրոֆեսոր,

Խ. Աբովյանի անվան ՀՊՄՀ համաշխարհային պատմության և նրա դասավանդման մեթոդիկայի ամբիոնի վարիչ