ՏԵՍԱՆՅՈՒԹ․ Մենք մեր ժողովրդին ներկայանում ենք հաղթանակներ կերտած, ճգնաժամեր հաղթահարած հավաքականությամբ․ Ի․ Սաղաթելյան

Այսօր մեր ժողովրդի հաղթանակի օրն է՝ Շուշիի ազատագրման օրը, սակայն այդքան թանկ գնով ձեռք բերված հաղթանակը խլված է մեզնից՝ ըստ Yerkir.am-ի ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը «Հայաստան» դաշինքի ձևավորման միջոցառմանը, որը կազմվեց ՀՀ երկրորդ նախագահ Ռոբերտ Քոչարյանի, Հայ Հեղափոխական Դաշնակցության և «Վերածնվող Հայաստան» կուսակցության միջև։:

Հազարավոր նվիրյալների կյանքի գնով ազատագրված Հայրենիքը կրկին հայտնվել է գերության մեջ՝ նշեց Իշխան Սաղաթելյանը:

«Խոցված է մեր արժանապատվությունը, մեզ փորձում են կոտրել ու ոչնչացնել։ Այսօր հայ ժողովրդի պատմության ամենաճակատագրական պահերից մեկն է։ Համակողմանի ճգնաժամի մեջ ենք՝ ռազմաքաղաքական,  սոցիալ-տնտեսական և բարոյահոգեբանական»,-ասաց նա։ 

Սաղաթելյանի խոսքով՝ իրենք շարունակում են պայքարն ընդդեմ ստի,  ամբարտավանության, անարդարության ու ապաշնորհության:  

«Երեք տարի շարունակ սրանց կողմից ներազգային ատելության սերմանումը, բաժանարար գծերի անցկացումը բերեցին հազարավոր զոհեր, կորուստներ և պարտություն: Ուստի վերահաստատում ենք. ուղիղ վեց ամիս առաջ սկսած պայքարի՝ հաղթական ավարտի անհրաժեշտությունը՝ պարտության մարմնացում, հողին ու հային դավաճանած չարիքի իշխանությունը պետք է հեռացվի։ Մենք դա անելու ենք, անելու ենք միասին՝ հանուն հայրենիքի»,-ասաց Իշխան Սաղաթելյանը:

Նա փաստեց, որ առաջիկա ընտրությունները սովորական չեն, դա մեր կյանքի ամենապատասխանատու ու ճակատագրական ընտրությունն է։

«Սա ընտրություն է ազգայինի և ազգադավի, արժանապատվության ու ստրկամտության, պատասխանատվության և ամբոխավարության, աշխատանքի և ձրիակերության, անկեղծության և ստախոսության, անվտանգ ապրելու, զարգանալու և անհեռանկար ապագայի միջև: Ի վերջո, սա պետականություն ունենալ-չունենալու ընտրություն է»,-ասաց Իշխան Սաղաթելյանը։

Նա վստահեցրեց, որ այս գիտակցությունն է, որ ՀՅ Դաշնակցությանը բերեց ուժերը համախմբելու, միասնական ճակատով հանդես գալու որոշմանը։

«ՀՅ Դաշնակցությունը առաջիկա ընտրություններին մասնակցելու է ՀՀ երկրորդ Նախագահ Ռոբերտ Քոչարյանի, «Վերածնվող Հայաստան» կուսակցության հետ դաշինքով: Մենք մեր ժողովրդին ներկայանում ենք հաղթանակներ կերտած, ճգնաժամեր հաղթահարած, պետականության կայացման գործում հաջողած, փորձով ու գիտելիքով, պատասխանատվությամբ ու վճռականությամբ, հավատով ու գաղափարականությամբ օժտված հավաքականությամբ»,-նշեց Իշխան Սաղաթելյանը:

Մանրամասն՝ տեսանյութում․