Պեսկովն անընդունելի է համարել Նավալնիի մահվան մեջ Մոսկվային մեղադրելը

Ալեքսեյ Նավալնիի մահվան թեմայով արևմտյան քաղաքական գործիչների հայտարարությունները տաղտկալի են, լրագրողներին ասել է ՌԴ նախագահի մամուլի քարտուղար Դմիտրի Պեսկովը, փոխանցել է ТАСС-ը։

Կրեմլի ներկայացուցիչը ուշադրություն է հրավիրել այն փաստի վրա, որ հետաքննությունը շարունակվում է, և ձեռնարկվում են բոլոր անհրաժեշտ գործողությունները, սակայն մինչ այժմ հետաքննության արդյունքները չեն հրապարակվում։

Նա հավելել է, որ անընդունելի է բացահայտ նենգ հայտարարություններ անելը, թե Նավալնիի մահվան մեջ մեղավոր է Կրեմլը։

«Սա չի կարող վնասել մեր պետության ղեկավարին, սակայն այդ արտահայտությունները բոլորովին չեն «զարդարում» նրանց, ովքեր անում են դրանք։ Դա հարիր չէ պետական պաշտոնյաներին, որոնց շուրթերից մենք լսեցինք այդ ամենը»,- ասել է Պեսկովը։

Պեսկովը չի խոսել այն մասին, թե ինչպիսին է եղել Ռուսաստանի նախագահ Վլադիմիր Պուտինի արձագանքը Նավալնիի մահվանը։ «Ես ոչինչ չունեմ ավելացնելու այն ամենին, ինչ ասվել է այս թեմայով», - պարզաբանել է Կրեմլի խոսնակը: