Բայրամովը Ջեյմս Օ՛Բրայենի հետ հանդիպմանը կրկնել է Ալիևի մտքերն ու պահանջները

Փետրվարի 16-ին Ադրբեջանի արտգործնախարար Ջեյհուն Բայրամովը Մյունխենի անվտանգության համաժողովի շրջանակներում հանդիպել է ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենի հետ։ Այս մասին հաղորդվում է ադրբեջանցի նախարարի X սոցիալական ցանցի էջում։

Տեղեկատվության համաձայն՝ հանդիպման ընթացքում քննարկվել են երկու երկրների երկկողմ և բազմակողմ օրակարգի հարցեր, ինչպես նաև Ադրբեջանի և Հայաստանի միջև երկկողմ հարաբերությունների կարգավորման գործընթացի հեռանկարները։

Ջեյհուն Բայրամովը վերջին սահմանային սադրանքի մեղքը (որի հետևանքով հայկական կողմը 4 զոհ ունեցավ) կրկին բարդել է հայկական կողմի վրա ու նշել, որ իբր դա հարվածում է խաղաղության գործընթացին։

Բայրամովը դժգոհությունէ  հայտնել նաև Հայաստանում ԵՄ դիտորդական առաքելության ընդլայնման կապակցությամբ։

Ադրբեջանի արտգործնախարարը նաև մեղադրել է Հայաստանին Ադրբեջանի տարածքային ամբողջականության և ինքնիշխանության նկատմամբ, իբր, պահանջներ ունենալու մեջ ու ևս մեկ անգամ պնդել, որ Հայաստանը «պետք է սահմանադրության մեջ համապատասխան փոփոխություններ կատարի»։