Ագրեսոր պետության ղեկավարը կրկնել է իր պահանջները

 Ցեղասպան երկրի նախագահ Իլհամ Ալիևը նշել է այն պայմանները, որոնց հիման վրա կարող է ստորագրվել Հայաստանի հետ խաղաղության պայմանագիրը:

«Այսօրվա դրությամբ խաղաղ պայմանագրի տեքստը, որը բաղկացած է 17 կետից, լիովին համաձայնեցված է։ Ադրբեջանը ոչ մի լրացուցիչ պայման չի առաջ քաշում։ Մեր պայմանները հայտնի են Հայաստանին, դրանք նոր չեն։ Մենք վաղուց ենք հայտարարել այդ պայմանների մասին։ Սակայն մենք մինչ օրս Հայաստանից լուրջ պատասխան չենք ստացել»,-ասել է Ալիևն այսօր մամուլի համար հայտարարությամբ հանդես գալով Գերմանիայի նախագահ Ֆրանկ-Վալտեր Շտայնմայերի հետ:

Ալիևը կրկնել է այդ պայմանները՝ ԵԱՀԿ Մինսկի խմբի վերացման անհրաժեշտությունը և Հայաստանի Սահմանադրության փոփոխությունը։

«Ինչպես ասում են՝ գնդակը Հայաստանի դաշտում է։ Եթե Հայաստանն իսկապես ցանկանում է խաղաղության պայմանագիր կնքել, ապա պետք է ընդունի Ադրբեջանի այս երկու օրինական պայմանները», - ասել է նա, հավելելով՝ որ գերմանացի գործընկերոջը մանրամասն տեղեկացրել է Ադրբեջանի և Հայաստանի միջև խաղաղության գործընթացի մասին: