ՌԴ-ն Ղարաբաղում խաղաղապահների ներկայության պայմանները կքննարկի միայն Բաքվի հետ․ Գալուզին

Մոսկվան Լեռնային Ղարաբաղում ռուս խաղաղապահների ներկայության պայմանները կքննարկի միայն Բաքվի հետ՝ կապված տարածաշրջանում իրավիճակի արմատական ​​փոփոխության հետ։ Այս մասին ТАСС-ին տված հարցազրույցում հայտարարել է ՌԴ փոխարտգործնախարար Միխայիլ Գալուզինը։

«Հաշվի առնելով Ղարաբաղում իրավիճակի արմատական ​​փոփոխությունը՝ մեր խաղաղապահների մնալու պայմանները քննարկվում են միայն ադրբեջանական կողմի հետ»,- ասել է նա։

Գալուզինի խոսքով՝ Ադրբեջանի հետ երկխոսությունը կառուցողական է։

«Բոլոր հարցերը, որոնք ծագում են, լուծում ենք երկուստեք ընդունելի ձևով։ Ինչ վերաբերում է 2025 թվականի նոյեմբերից հետո ռուսական խաղաղապահ կոնտինգենտի լիազորությունների երկարացմանը, ապա դա կախված կլինի տարածաշրջանում տիրող իրավիճակից, նրանց հետագա ներկայության պահանջից և Բաքվի հետ համապատասխան պայմանավորվածություններից»,- հավելել է փոխնախարարը։