կարևոր
601 դիտում, 1 շաբաթ առաջ - 2022-09-21 14:02
Քաղաքական

Սիսիանի ընտրություններում ՀՅԴ կառույցը ներկայացրել է իր ցանկը

Սիսիանի ընտրություններում  ՀՅԴ կառույցը ներկայացրել է  իր ցանկը

1990-ականների առաջին տարիները ՀՅ Դաշնակցության կառույցի համար Հայաստանում ձևավորման շրջան էր: Նոր ձևավորվող կազմակերպության կայացումը տեղի էր ունենում Արցախյան ազատագրական պայքարի հորձանուտում:

Սիսիանի բնակչությունը և տեղի ՀՅԴ կազմակերպությունը  պարտավորված էին պաշտպանելու երկու սահմանագիծ, ինչպես` Նախիջևանի, այնպես էլ Բերձոր-Լաչինի կողմից:

Չնայած ամենուր հանդիպող բազում հոգսերին Սիսիանի մեր ընկերները խանդավառ էին, եռանդուն և տոգորված գալիք հաղթանակների անսասան հավատով: Այդ տրամադրությամբ էլ նրանք մասնակցեցին Բերձորի «Կյանքի ճանապարհի ազատագրմանը» հարավի սահմանների պաշտպանությանն ու տարածքների ազատագրմանը:

Տասնամյակների վայրիվերումները շատ բան փոխեցին մեր շուրջը, բայց մի բան Սիսիանի մեր ընկերների մեջ մնաց անփոփոխ` իրենց ազգային ու մարդկային խառնվածքի անխաթարությունը:Այն առաջին տարիներից տպավորված կերպարների մեջ վառ անհատականություն է Ավագյան Աշոտը, մեր նկարիչ ընկերը` միշտ հումորով, միշտ ուղղախոս և գործի համար պատրաստակամ: Դժվարին առաջին տարիներից հետո Աշոտ Ավագյանը հնարավորություն ունեցավ վերադառնալու իր սիրելի գեղանկարկարչությանը, նրա կտավները հաճախ ցուցադրվում են երևանյան ու արտերկրի ցուցահանդեսներում: Պատահական չէ, որ Աշոտին վստահվեց Մաշտոցի անվան Մատենադարանի սիմպոզիումների սրահի համար պատրաստել համապատասխան գեղանկար և Աշոտ Ավագյանի նկարած «Մաշտոց» ստեղծագործությունն արժանացավ պետական մրցանակի:

Ստեղծագործական և առօրյա խնդիրների բովում Աշոտ Ավագյանն, իր ընկերների հետ, չկորցրեց հասարակական, քաղաքական ակտիվությունը, իսկ երբ կրկին պատերազմը մտավ Արցախ նրանք կրկին զենքն առան ու գնացին պաշտպանելու հայրենիքը: Հիմա Սիսիանի մեր ընկերները որոշել են, հայրենիքի և հարազատ սիսիանցիների շահերը պաշտպանելու համար առաջիկա տեղական ընտրություններում ներկայացնել Սիսիանի ավագանու թեկնածուների ցանկ, որը գլխավորելու պատասխանատվությունը, որպես  ապագա քաղաքապետի թեկնածուի, վստահվել է  Աշոտ  Ավագյանին: Ո՞ւմ ձայն կտա երեսուն տարուց ավելի զանազան ընտրություններում խաբված ու հիսաթափված սիսիանցին: Մեր այսօրվա ազգային դժբախտության գլխավոր պատճառն այն է, որ ժողովորդին անընդհատ խաբում են ամպագորգոռ ճարտասանությամբ, և ընտրող քաղաքացին շատ հաճախ ետ չի դառնում նայելու, թե այդ  դմբդմբացնողները ի՞նչ կենսագրություն ունեն, ի՞նչ ճանապարհ են անցել, ովքե՞ր են նրանց թիկունքին, ի՞նչ թիմով ու ծրագրով են գալիս` գալիս են քանդելու և պառակտելո՞ւ, թե եղած լավը պաշտպանելու, սխալները սրբագրելու և ստեղծվածի վրա նորն ավելացնելու: Ընտրության մեջ չվրիպելու անհրաժեշտությունն առավել քան պարտադիր է, երբ այսօր ու մոտ ապագայում հենց Սիսիանի ու Սյունիքի ճակատագիրն է որոշվելու: Իսկ տեղական իշխանությունն այս դեպքում շատ կարևոր է ժողովրդի հետ անմիջականորեն աշխատելու, մարդկանց համախմբելու, նրանց պաշտպանունակությունն ամրապնդելու, սոցիալ-տնտեսական արդար քաղաքականությամբ մարդկանց իրենց հողին կպած պահելու և Սյունիքի դարպասները թշնամու առջև չբացելու համար: Դաշնակցության Սիսիանի կառույցը ժողովրդին իր  նվիրվածությունն ապացուցել է բազում անգամներ: Մեր ընկերների ապրած կենսագրությունն ամենալավ փաստարկն է այն բանի, թե որքանով են նրանք արժանի իրենց երկրացիների վստահությանը: Սիսիանցին գիտե, որ դաշնակցականները և նրանց նախընտրական ցանկը գլխավորող Աշոտ Ավագյանը այս տարիների ընթացքում պահպանել են ամենակարևորը`  սեփական դեմքը, չեն դավաճանել իրենք իրենց: Սիսիանի ավագանու ընտրություններում տեղի Դաշնակցության կառույցը ներկայացրել է ավագանու իր ցանկը: Ընտրությունը մնում է ժողովրդին:

Արտաշես  Շահբազյան