Հյուսիսային Իրաքում ոչնչացվել է 26 թուրք զինվոր

Պարտիզանների լայնածավալ ռազմական գործողությունների արդյունքում հետ մղելով հակառակորդին՝ ոչնչացվել է 26 թուրք զինվորական, այդ թվում՝ երկու սպա։ Քուրդ մարտիկները զենք ու զինտեխնիկա են առգրավել։ Այս մասին հայտնում է քրդական Fırat գործակալությունը:

Երեքշաբթի Քուրդիստանի ժողովրդական ինքնապաշտպանության ուժերը (HPG) համակարգված ռազմական գործողություններ են իրականացրել թուրքական օկուպացիոն ուժերի դեմ Իրաքի հյուսիսային Զապ շրջանում:

HPG մամուլի կենտրոնի` չորեքշաբթի հրապարակված հաղորդագրության համաձայն՝ ոչնչացվել է հակառակորդի 26 զինծառայող, այդ թվում՝ երկու սպա։ Կռիվների ընթացքում մարտիկները գրավել են բազմաթիվ զինատեսակներ։ Նահանջի ժամանակ բախումներում զոհվել է քուրդ պարտիզաններից մեկը՝ Մահիր Մազլումը։

Հիշեցնենք, որ ապրիլի 18-ից Թուրքիան վերսկսել է իր օկուպացիոն ռազմական գործողությունները Իրաքի հյուսիսում: