Հյուսիսային Իրաքում քրդական ուժերը սպանել են 6 թուրք զինվորի

Քուրդիստանի աշխատավորական կուսակցության (ՔԱԿ-PKK) ռազմական թևերից մեկի՝ «Ժողովրդի պաշտպանության ուժերի» (HPG) և թուրք զինվորների միջև բախումներ են սկսվել Հյուսիսային Իրաքի Բարզանի շրջանում։ Բախումների ժամանակ  6 թուրք զինվոր է սպանվել։ Այս մասին հայտմում է ermenihaber.am կայքը` քրդական ANF գործակալության հղումով:

Բախումները սկսվել են այն բանից հետո, երբ թուրք զինվորները բավականաչափ մոտեցել են քուրդ զինյալների հենակետերին, ինչին ի պատասխան քրդական կողմը կրակ է բացել, արդյունքում` թուրքական կողմը տվել է 6 զոհ:

Թուրքիան, ի պատասխան այս գործողությունների, կրակի տակ է պահել բախման տարածքը, որի ընթացքում թիրախավորել է նաև խաղաղ բնակչությանը։ 

Ըստ գործակալության` բախումների ժամանակ քուրդ զինյալները կենդանի ուժի ոչ մի կորուստ չեն ունեցել։

Հավելենք, որ PKK-ն Թուրքիայում համարվում է ահաբեկչական կազմակերպություն։