Մհեր Գրիգորյանը և ԻԻՀ էներգետիկայի նախարարը հուշագիր են ստորագրել

2022թ-ի մայիսի 12-ին Երևանում կայացավ հայ-իրանական միջկառավարական համատեղ հանձնաժողովի 17-րդ նիստը՝ ՀՀ փոխվարչապետ Մհեր Գրիգորյանի և ԻԻՀ էներգետիկայի նախարար Ալի Աքբար Մեհրաբիանի համանախագահությամբ։ Այս մասին հայտնում է Իրանում ՀՀ դեսպանությունը:

«Իր ելույթում փոխվարչապետ Մ.Գրիգորյանը կարևորեց էներգետիկ և տրանսպորտի բնագավառներում փոխադարձ պայմանավորվածությունների արձանագրումը, առևտրի, արդյունաբերության, առողջապահության, կրթության, մշակույթի, զբոսաշրջության, գյուղատնտեսության և բարձր տեխնոլոգիաների ոլորտներում համագործակցությունը զարգացնելու երկու պետությունների պատրաստակամությունը:

ԻԻՀ էներգետիկայի նախարար Ա.Ա.Մեհրաբիանն իր հերթին գոհունակությամբ նշեց, որ հայ-իրանական համագործակցությունը գտնվում է բարձր մակարդակի վրա, նախորդ տարիների համեմատությամբ բարելավում է գրանցվել երկկողմ տնտեսական հարաբերություններում՝ միևնույն ժամանակ ընդգծելով, որ հայ-իրանական առևտրային համագործակցության ներուժն ավելին է, քան ներկայիս ծավալը։

Նիստի արդյունքում ստորագրվեց երկկողմ պայմանավորվածություններն ամփոփող փոխըմբռնման հուշագիր»,- նշված է հաղորդագրությունում։