ՀՀ և ՌԴ էներգետիկայի նախարարները գազի գնի իջեցման մասին արձանագրություն են ստորագրել

Երեկ ՌԴ էներգետիկայի նախարար Ալեքսանդր Նովակը հանդիպում է ունեցել Հայաստանի էներգետիկայի և բնական պաշարների նախարար Երվանդ Զախարյանի հետ: Այդ մասին ասվում է ՌԴ էներգետիկայի նախարարության պաշտոնական  կայքում։

Նովակը նշել է, որ Ռուսաստանի և Հայաստանի միջև էներգետիկ ոլորտում համագործակցությունը նոր թափ է ստացել Հայաստանի՝ ԵՏՄ-ին միանալուց հետո։ Նա ասել է, որ ներկայումս Ռուսաստանը Հայաստան ներկրվող նավթամթերքի հիմնական մատակարարն է. ընթացիկ տարում առանց տուրքի Հայաստան է մատակարարվել 70 հազար տոննա նավթամթերք:

Երկկողմ հանդիպման ընթացքում կողմերը  արձանագրություն են ստորագրել ՀՀ-ին մատակարարվող բնական գազի գնի ձևավորման կարգի վերաբերյալ` 2013-ի դեկտեմբերի 2-ի համաձայնագրում փոփոխություններ կատարելու մասին։

Փաստաթուղթն իրավաբանորեն Հայաստանին մատակարարվող 1000 խ/մ ռուսական գազի բազային գինը 189 դոլարից նվազեցնում է մինչև 165 դոլար, ինչպես նաև բազային պայմաններ է սահմանում «Գազպրոմ Արմենիա» ՓԲԸ-ի նորմալ գործունեության համար։   

Հայկական կողմը պարտավորվել է պայմաններ ապահովել Հայաստանում «Գազպրոմի» էլեկտրաէներգետիկ ակտիվների արդյունավետ աշխատանքի համար` ինչպես ներքին, այնպես էլ արտաքին շուկաներում: