244 անձ է բերման ենթարկվել. ՀՀ ոստիկանությունը պարզաբանել է

«Դիմադրություն» շարժման այսօրվա ակցիաների ժամանակ 14:00-ի դրությամբ բերման է ենթարկվել 244 անձ: Այս մասին Yerkir.am-ին տեղեկացրին ՀՀ ոստիկանության լրատվական ծառայությունից: Բերման ենթարկվածների թվում են եղել նաեւ ԱԺ «Հայաստան» խմբակության պատգամավորներ:

«Հայաստան» դաշինքի անդամ, պատգամավորի օգնական Գերասիմ Վարդանյանին ՀՀ ոստիկանության Մալաթիա-Սեբաստիայի բաժին բերման են ենթարկել ձեռնաշղթաներով եւ կալանքի միջնորդություն է ներկայացվել դատարան՝ նրան ազատությունից զրկելու համար: Պատճառը, սակայն, ոչ թե անհնազանդության ակցիաներին մասնակցելն է, այլ նոյեմբերի 9-ի լույս 10-ի գիշերը տեղի ունեցած իրադարձությունները: Ոստիկանությունից Yerkir.am-ին ասացին, որ այս առնչությամբ տեղեկություններ կհաղորդեն ավելի ուշ:

Նշենք, որ Ոստիկանության բաժնում պատգամավոր Աննա Գրիգորյանի հորդորից հետո Գերասիմ Վարդանյանի ձեռնաշղթաները հանել են, իսկ մինչ այդ նա բաժնում եղել է ձեռնաշղթաներով, ինչը հաղորդում է հանցագործության մասին։

Հ.Գ.

Քիչ առաջ հայտնի դարձավ, որ ՀՅԴ անդամ Գերասիմ Վարդանյանը ձերբակալվել է։

Տեղեկությունը հաստատել է նրա փաստաբան Բենիկ Գալստյանը։

Նշվում է, որ նրան մեղադրանք է առաջադրվել։

Լիանա Սարգսյան