Մեծ Բրիտանիան պատրաստ է հանդես գալ որպես Ուկրաինայի անվտանգության երաշխավոր

Մեծ Բրիտանիան պատրաստ է դեր խաղալ Ուկրաինային անվտանգության երաշխիքներ տրամադրելու հարցում, եթե համապատասխան հարցում ստանա Կիևից։ Այս մասին հայտարարել է ՄԱԿ-ում Մեծ Բրիտանիայի մշտական ներկայացուցիչ Բարբարա Վուդվորդը։

«Մենք ուրախ կլինենք դեր խաղալ այս հարցում, եթե Ուկրաինայի կառավարությունը մեզ դա խնդրի»,- ասել է նա։

Վուդվորդն ընդգծել է, որ Լոնդոնը Ուկրաինային ցուցաբերում է զգալի ռազմական օգնություն և մարդասիրական աջակցություն։ Նրա խոսքով՝ Մեծ Բրիտանիայի վարչապետ Բորիս Ջոնսոնը գրեթե ամեն օր խոսում է Ուկրաինայի նախագահ Վլադիմիր Զելենսկիի հետ։

Նման դիրքորոշում է հայտնել նաև Բորիս Ջոնսոնի մամուլի քարտուղարը։ Նա չի բացառել, որ Մեծ Բրիտանիան Թուրքիայի և ԱՄՆ-ի հետ կարող է հանդես գալ որպես Ուկրաինայի անվտանգության երաշխավոր, եթե վերջինս համաձայնի չեզոք կարգավիճակին՝ որպես խաղաղության պայմանագրի մաս։

«Որքանով ես գիտեմ, մինչ այժմ դրա վերաբերյալ պաշտոնական հարցում չի եղել»,- մամուլի խոսնակի խոսքերն է մեջբերում բրիտանական Times թերթը։