Եվրանեսթի արդյունքներով բյուրոյում ընդունվել է հայտարարություն, որն ամբողջապես հակառուսական է

Պետք է արձանագրենք, որ այս պահին միայն ադրբեջանական կողմն է հայտարարում, որ խնդիրն ավարտված է, կոնֆլիկտն այլևս գոյություն չունի, և դրան ի պատասխան Եվրամիությունն ասում է, որ կոնֆլիկտն ավարտված չէ, և բանակցությունները պետք է շարունակել․ մամուլի ասուլիսում նշեց «Հայաստան» խմբակցության պատգամավոր Աննա Գրիգորյանը:

«Երեկ ՌԴ նախագահը ևս հայտարարել է, որ կոնֆլիկտն ավարտված չէ, ԱՄՆ-ից հնչում է հայտարարություն, որ կարգավիճակի լուծման խնդիր կա, այսինքն՝ միջազգային հանրությունը, հավաքական առումով, արձանագրում է, որ կոնֆլիկտն ավարտված չէ, և բանակցությունները պետք է շարունակել՝ Մինսկի խմբի համանախագահությամբ: Բայց ես ուզում եմ հասկանալ՝ այս իշխանությունն, օրինակ, ի՞նչ է արել, երբ ադրբեջանական կողմից բռնապետ Ալիևը հայտարարում էր, որ Մինսկի խմբին թոշակի է ուղարկում: Դրանից հետո որևէ արձագանք արտաքին գործերի նախարարի, նախարարության կողմից չի հնչել: Այսինքն՝ համաձա՞յն են այդ ձևակերպման հետ»,- ասաց պատգամավորը: