Թուրքիան չի ցանկանում, որ պատերազմ լինի Ռուսաստանի և Ուկրաինայի միջև

Թուրքիան չի ցանկանում պատերազմ Ռուսաստանի և Ուկրաինայի միջև և հույս ունի, որ Մոսկվայի և Կիևի միջև տարաձայնությունները կլուծվեն խաղաղ ճանապարհով։ Այս մասին Թուրքիայի սեւծովյան ափին գտնվող Տրապիզոն քաղաքում երիտասարդների հետ հանդիպման ժամանակ ասել է երկրի նախագահ Ռեջեփ Թայիփ Էրդողանը։

«Մենք երբեք չէինք ցանկանա պատերազմ Ռուսաստանի և Ուկրաինայի միջև: Սա վատ նշան է տարածաշրջանի համար: Որպես ՆԱՏՕ-ի երկիր՝ մենք դա չենք ուզում, մենք դա չենք ընդունում: Հուսով եմ, որ այս հարցը կարող է լուծվել խաղաղ ճանապարհով»,- ասել է նա։

Պետության ղեկավարը հիշեցրել է, որ այս ամիս այցելելու է Ուկրաինա, իսկ ՌԴ նախագահ Վլադիմիր Պուտինը մոտ ժամանակներս կայցելի Թուրքիա։

Ավելի վաղ Էրդողանը բազմիցս հայտարարել էր, որ Թուրքիան պատրաստ է իր տարածքում ընդունել Վլադիմիր Պուտինի և Վլադիմիր Զելենսկու հանդիպումը։

Էրդողանի խոսքով՝ Թուրքիայի և Ռուսաստանի հարաբերությունները ներկայումս պատմության մեջ երբևէ եղած ամենաբարձր մակարդակի վրա են։ Նա նշել է, որ այս փաստը թույլ է տվել երկրներին զգալիորեն մեծացնել երկկողմ ապրանքաշրջանառության ծավալը։