Թուրքիան մոտ է Ադրբեջանի հետ 1 մլրդ եվրոյի գործարք կնքելուն

Թուրքիան մոտ է առաջիկա շաբաթներին Ադրբեջանի հետ 1 միլիարդ եվրոյի փոխանակման համաձայնագրի ստորագրմանը. հաղորդում է Middle East Eye-ը՝ վկայակոչելով երկու թուրք պաշտոնյայի:

Առաջարկվող համաձայնագիրը արտարժույթի մի քանի սվոփ-գործարքներից մեկն է, որը Թուրքիան վերջերս կնքել է իր արտարժույթի պահուստները համալրելու համար:

«Գործարքը գրեթե ավարտված է,- ասել է թուրք բարձրաստիճան պաշտոնյան:- Պարզապես բյուրոկրատիան ժամանակ է պահանջում»:

Չորեքշաբթի Թուրքիան Արաբական Միացյալ Էմիրությունների հետ արժույթի փոխանակման շուրջ 5 միլիարդ դոլար արժույթի համաձայնագիր է ստորագրել արժութային ճգնաժամի պայմաններում, որը դատարկել է Թուրքիայի կենտրոնական բանկի գանձարանը:

Թուրքիան ֆինանսական աջակցության խիստ կարիք ունի ԱՄՆ դոլարի նկատմամբ լիրայի ռեկորդային արժեզրկման պայմաններում, ինչը հիմնականում պայմանավորված է Թուրքիայի նախագահ Ռեջեփ Թայիփ Էրդողանի՝ տոկոսադրույքների դեմ խաչակրաց արշավանքով:

Չհաշված սվոփներն ու պարտավորությունները՝ Թուրքիայի կենտրոնական բանկի զուտ միջազգային պահուստները անցյալ ամիս նվազել են մինչև մինուս 56 միլիարդ դոլար, ինչը նվազագույնն է 2002 թվականից ի վեր: