Եվրախորհրդարանը հաստատել է 2026-2027 թթ. Ուկրաինային 90 մլրդ եվրոյի ֆինանսական օգնության մասին առաջարկը

Եվրախորհրդարանի պատգամավորները Ստրասբուրգում կայացած լիագումար նիստում քվեարկել են 2026-2027 թվականներին Ուկրաինային 90 միլիարդ եվրոյի վարկ տրամադրելու օգտին։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը:

Եվրահանձնաժողովի համապատասխան առաջարկը հավանության է արժանացել 458 «կողմ», 140 «դեմ» ձայնով, իսկ 44-ը ձեռնպահ են մնացել։

Եվրախորհրդարանի նիստի նյութերում հիշատակվում է, որ 2025 թ. հոկտեմբերի 23-ին 26 անդամ պետությունները Եվրահանձնաժողովին հանձնարարել են հնարավորինս շուտ ներկայացնել Ուկրաինային ֆինանսական աջակցության առաջարկը։ Եվրահանձնաժողովն առաջարկել է նման ֆինանսավորման տարբերակներ։ Եվրոպական խորհուրդը համաձայնել է Ուկրաինային 90 միլիարդ եվրոյի վարկ տրամադրել 2026-2027 թվականների համար՝ հիմնվելով ԵՄ-ի բյուջեով երաշխավորված կապիտալիների շուկայի փոխառության վրա։

Դրա հետ մեկտեղ նախօրոք որոշվել էր, որ վարկը կմարվի փոխհատուցումների հաշվին, որոնք ենթադրվում է ստանալ Ռուսաստանից։

Կիևի համար նախատեսված 90 միլիարդ եվրոյից 60 միլիարդը պլանավորվում է ծախսել Ուկրաինայի պաշտպանության նպատակներով։

Այժմ ԵՄ խորհուրդը պետք է վերջնական պաշտոնական որոշում ընդունի վարկի տրամադրման կանոնակարգի վերաբերյալ։