Վրաստանն ու Թուրքիան բարեկամական հարաբերություններ ունեն. Ղարիբաշվիլի

Թբիլիսին գոհ է Թուրքիայի հետ ռազմավարական հարաբերություններից և հանդես է գալիս երկկողմ կապերի հետագա ամրապնդման օգտին։ Այս մասին «Իմեդի» հեռուստաալիքի եթերում ասել է Վրաստանի վարչապետ Իրակլի Ղարիբաշվիլին։

«Վրաստանը շատ սերտ, բարեկամական և եղբայրական հարաբերություններ ունի Թուրքիայի հետ»,- ասել է կառավարության ղեկավարը։

Ղարիբավշիլին հիշեցրել է, որ հունիսին պաշտոնական այցով եղել է Անկարայում, որտեղ իրեն ընդունել է Ռեջեփ Թայիփ Էրդողանը։ «Ես շնորհակալ եմ նախագահ Էրդողանին ջերմ ընդունելության համար։ Մենք մի քանի խոսակցություն ունեցանք, այդ թվում՝ հեռախոսով։ Մեզ կապում են ազնիվ և բաց հարաբերությունները»,- ասել է Վրաստանի վարչապետը։

Ըստ նրա՝ Թուրքիան շատ կարևոր երկիր է տարածաշրջանում, և Վրաստանը շարունակում է ջանքեր գործադրել երկկողմ հարաբերությունների ամրապնդման համար։

«Իհարկե, Թուրքիան շատ կարևոր խաղացող է տարածաշրջանում, և մենք գոհ ենք ռազմավարական գործընկերությունից։ Մենք պետք է պահպանենք, ամրապնդենք, խորացնենք այդ հարաբերությունները։ Ես ամեն ինչ անում եմ այս ուղղությամբ և ուրախ եմ, որ Թուրքիայի նախագահը հավատարիմ է նույն մոտեցմանը»,- հավելել է Ղարիբաշվիլին։