Ռուսաստանը, ԱՄՆ-ն ու Ադրբեջանը Թուրքիային գազ մատակարարող եռյակում են

Ընթացիկ տարվա հոկտեմբերին Թուրքիա բնական գազի ներմուծումն աճել է 15,2 տոկոսով՝ մինչև 4 մլրդ 657 մլն խմ։ Այդ մասին երեքշաբթի հայտնել է Թուրքիայի էներգետիկ շուկայի կարգավորման մարմինը (EPDK):

Շուրջ 3 մլրդ 22 մլն խմ ներկրված գազը երկիր է մատակարարվել խողովակաշարերով, 1 մլրդ 634 մլն խմ՝ հեղուկ բնական գազի (LNG) տեսքով՝ լցանավերով։

Նշված ժամանակահատվածում գազատարներով բնական գազի ներմուծումը Թուրքիա կրճատվել է 6,9 տոկոսով, իսկ LNG լցանավերով մատակարարումներն աճել են 105,5 տոկոսով։

Հոկտեմբերին Թուրքիան Ռուսաստանից գնել է բնական գազի ամենամեծ ծավալները՝ 1 մլրդ 865 մլն խմ։ Նրան հաջորդում է ԱՄՆ-ը՝ 888 մլն խմ, իսկ Ադրբեջանը՝ 762 մլն խմ։

Նշված ժամանակահատվածում Ռուսաստանից և Ադրբեջանից ներմուծումը նվազել է, համապատասխանաբար, 8,8 տոկոսով և 30,9 տոկոսով, իսկ ԱՄՆ-ից մատակարարվող գազի ծավալն աճել է 748 տոկոսով։