Բայդենը ստորագրել է 2022 ֆինանսական տարվա բյուջեն

Նախագահ Ջո Բայդենը ստորագրել է Ազգային պաշտպանության օրենքը (NDAA) 2022 ֆինանսական տարվա համար, որը նախատեսում է 770 միլիարդ դոլարի պաշտպանական կարիքներ, հայտնում է «Ամերիկայի ձայնը»։

Այս ամսվա սկզբին Սենատն ու Ներկայացուցիչների պալատը ճնշող մեծամասնությամբ ընդունել էին Պաշտպանության նախարարության քաղաքականությունը հաստատող օրինագիծը:

Ինչպես նշվում է Սպիտակ տան պաշտոնական հաղորդագրության մեջ, փաստաթուղթը նախատեսում է հատկացումներ պաշտպանության նախարարության ծրագրերի, ռազմական օբյեկտների կառուցման, ազգային անվտանգության եւ հետախուզական ծրագրերի ոլորտում էներգետիկայի նախարարության նախագծերի համար։

Սպիտակ տունը երախտագիտություն է հայտնել Սենատի եւ Ներկայացուցիչների պալատի զինված ուժերի հանձնաժողովների ղեկավարներին եւ բարձրաստիճան անդամներին, որոնք ղեկավարել են օրինագծի մշակումը։

2022 ֆինանսական տարվա պաշտպանական բյուջեն նախատեսում է ռազմական ծախսերի ավելացում մոտ 5 տոկոսով՝ անցյալ տարվա համեմատ։ Վերջնական փաստաթուղթը դեմոկրատների եւ հանրապետականների միջեւ ինտենսիվ բանակցությունների արդյունք է, որոնք ձգձգվել էին Չինաստանի եւ Ռուսաստանի նկատմամբ քաղաքականության շուրջ վեճերի պատճառով:

Օրենքը նախատեսում է զինվորականների աշխատավարձերի 2,7 տոկոսով բարձրացում, ինքնաթիռների ու նավերի գնումների ավելացում։ Փաստաթուղթը նաեւ նախանշում է աշխարհաքաղաքական սպառնալիքների, հատկապես Ռուսաստանի եւ Չինաստանի դեմ պայքարի ռազմավարություն:

Բացի այդ, այն նախատեսում է 300 միլիոն դոլարի հատկացում Ուկրաինայի անվտանգությանն աջակցելու նախաձեռնության շրջանակներում, 4 միլիարդ դոլար՝ Եվրոպական պաշտպանության նախաձեռնության շրջանակներում եւ 150 միլիոն դոլար՝ Բալթյան երկրներում անվտանգության համագործակցության համար:

Օրինագիծը նաեւ 7,1 միլիարդ դոլար է նախատեսում Խաղաղօվկիանոսյան զսպման նախաձեռնության համար: Բացի այդ, փաստաթուղթը ներառում է Կոնգրեսի հայտարարությունը՝ հաջակցություն Թայվանի պաշտպանությանը, ինչպես նաեւ արգելք է դնում Չինաստանի Սինցզյան շրջանում հարկադիր աշխատանքի միջոցով արտադրված ապրանքների գնման վրա։

Փաստաթուղթը նաեւ դրույթ է պարունակում 16 հոգուց բաղկացած հանձնաժողովի ստեղծման մասին, որը կվերլուծի Աֆղանստանում օգոստոսին ավարտված ռազմական արշավը։