ՏԵՍԱՆՅՈՒԹ․ Ասկերանում 2 նոր համայնք են կառուցում Ադրբեջանի բռնագրաված բնակավայրերի՝ անտուն մնացած բնակիչների համար

Արցախի Ասկերանում երկու նոր համայնք են կառուցում Ադրբեջանի ագրեսիայի պատճառով անտուն մնացած արցախցի ընտանիքների համար՝ հայտնում է Yerkir.am-ը։

Հովսեփավան համայնքի մոտ 100 բնակելի տուն ներառող բնակավայրը կառուցում է Ռուսաստանցի ձեռնարկատեր, բարեգործ, «Մոնարխ» ընկերությունների խմբի գործադիր տնօրեն, տեխնիկական գիտությունների դոկտոր Սերգեյ Համբարձումյանը։

Տների մի մասը նվիրվելու է մարդկանց, ում տները Շուշիում, Հադրութում զավթել են ադրբեջանցիները, մյուս մասը՝ զոհված ազատամարտիկների, զինվորականների ընտանիքներին։

Ստեղծվել է հանձնաժողով, որն էլ կորոշի՝ ում ընտրել բնակարանով ամենաառաջահերթն ապահովելու համար։

Համայնքի կառուցումը Սերգեյ Համբարձումյանի նախաձեռնությունն է՝ ամբողջությամբ այս ծրագիրը նա է ֆինանսավորում։

Հաջորդ բնակավայրը կառուցվում է Աստղաշեն համայնքի տարածքում՝ «Հայաստան» համահայկական հիմնադրամի միջոցներով։

Տները նվիրաբերվելու են Ադրբեջանի բռնագրաված 4՝ Սղնախ, Մադաթաշեն, Ջրաղացներ ու Մոշմհատ համայնքների, անտուն դարձած բնակիչներին։

Աշխատանքներն իրականացնող «Կապավոր» ՍՊԸ-ի գործադիր տնօրեն Արայիկ Դաբաղյանն ասաց՝ այս պահին աշխատում են մոտ 80 տան վրա, այսինքն, 80 տան հիմքերը գցված են, աշխատանքները տարբեր փուլերում են, մյուսները ևս կկառուցվեն։

ՀՅԴ Հայ դատի հանձնախմբերի և գրասենյակների 5-օրյա խորհրդաժողովին մասնակցելու համար Արցախում գտնվող՝ աշխարհի 20 երկրների պատվիրակները, այցելեցին շինհրապարակներ, ծանոթացան ծրագրերին ու աշխատանքների ընթացքին։

Աննա Բալյան

Մանրամասն՝ տեսանյութում․