ԱՄՆ-ը խստացնում է Իրանի դեմ պատժամիջոցները նրա ԱԹՍ-ների ծրագրի պատճառով

ԱՄՆ-ը մտադիր է կիրառել Իրանի վրա ազդելու բոլոր հնարավոր մեթոդները, որպեսզի թույլ չտա Թեհրանին՝ անօդաչու թռչող սարքեր ստեղծել և աշխարհում դրանց բաշխման ծրագիր մշակել. ասել է ԱՄՆ պետքարտուղար Էնթոնի Բլինքենը։

«Միացյալ Նահանգները կօգտագործի բոլոր համապատասխան գործիքները՝ հակազդելու Իրանի վնասակար ազդեցություններին և գործունեությանը, ներառյալ՝ անօդաչու թռչող սարքերի (ԱԹՍ) տարածմանը»,- ասվում է դիվանագետի հայտարարության մեջ, որը հրապարակվել է պետքարտուղարության կողմից:

Նաև ասվում է, որ Իսլամական հեղափոխության պահապանների կորպուսը (ԻՀՊԿ) կիրառել և տրամադրել է մահաբեր անօդաչու թռչող սարքեր Իրանի աջակցությունը վայելող խմբերին, որոնք հարձակումներ են իրականացրել նաև ԱՄՆ ռազմական օբյեկտների վրա:

Բլինքենն ասել է, որ ահաբեկչության դեմ պայքարին և զանգվածային ոչնչացման զենքերի տարածման դեմ ուղղված գործադիր հրամանների հիման վրա պատժամիջոցները կազդեն «իրանական վեց թիրախների վրա՝ երկու կազմակերպության և չորս անձի»։ Պետքարտուղարի խոսքով՝ պատժամիջոցների օբյեկտները «կապված են Իրանում անօդաչու թռչող սարքերի ոլորտում գործունեության հետ»։