Ռուսաստանը Թուրքիա գազ մատակարարողների շարքում առաջատարն է

Թուրքիան այս տարվա օգոստոսին ավելացրել է բնական գազի ներմուծումը 24,3 տոկոսով՝ մինչև 4 մլրդ 170 մլն խմ։ Այդ մասին երկուշաբթի  հայտնել է Թուրքիայի Էներգետիկ շուկայի կարգավորման մարմինը (EPDK):

Միաժամանակ, խողովակաշարերով երկիր է մատակարարվել մոտ 3 մլրդ 526 մլն խմ կապույտ վառելիք, 644 մլն խմ՝ հեղուկ բնական գազի (LNG) տեսքով՝ լցանավերով։

Հաշվետու ժամանակահատվածում գազատարներով բնական գազի ներկրումը Թուրքիա աճել է 27,6 տոկոսով, իսկ LNG տանկերով մատակարարումները՝ 8,9 տոկոսով։

Օգոստոսին Թուրքիան Ռուսաստանից գնել է բնական գազի ամենամեծ ծավալները՝ 2 մլրդ 80 մլն խմ։ Դրան հաջորդում է Իրանը` 898,2 մլն խմ, իսկ Ադրբեջանը` 547 մլն խմ:

Նշված ժամանակահատվածում Ռուսաստանից և Իրանից ներմուծումն աճել է, համապատասխանաբար, 51,9 տոկոսով և 121 տոկոսով, իսկ Ադրբեջանից մատակարարվող գազի ծավալը նվազել է 44,5 տոկոսով։

Հաշվետու ժամանակահատվածում Թուրքիայում բնական գազի սպառումն աճել է 42,4 տոկոսով՝ մինչև 4 մլրդ 366 մլն խմ։