Չինաստանը կանխատեսում է նոր «վիրուս X»-ի առաջացում

Մարդկությունն ապագայում, անշուշտ, նոր վիրուսի առաջ կկանգնի․ ըստ «ՌԻԱ Նովոստի»-ի՝ ասել է Հիվանդությունների վերահսկման և կանխարգելման չինական կենտրոնի ղեկավար Գաո Ֆուն:

«Աշխարհը կանգնած է ոչ միայն կորոնավիրուսային համաճարակի, այլև մի շարք այլ խնդիրների առջև, ինչպիսին է ինֆոդեմիան, երբ համապատասխան տեղեկություններն ու ապատեղեկատվությունը փոխկապակցված են: Սա ծնում է բազմաթիվ ասեկոսեներ և խնդիրներ, որոնք պետք է լուծվեն»,  ասել է մասնագետը:

Գաո Ֆուն ընդգծել է, որ ապագայում աշխարհը, անշուշտ, կկանգնի, այսպես կոչված, X վիրուսի դեմ, որի բնութագրերը դեռ բոլորի համար անհայտ են, և այն կարող են առաջանալ ցանկացած վայրում ու ցանկացած ժամանակ: Այս առումով՝ Չինաստանի հիվանդությունների վերահսկման և կանխարգելման կենտրոնի ղեկավարն առաջարկում է համատեղ ջանքեր գործադրել խնդրի լուծման համար, այն է` օգտագործել «չորս C» սկզբունքը` համագործակցություն (cooperation), մրցակցություն (competition), հաղորդակցություն (communication) և, վերջապես, համակարգում (coordination), երբեմն՝ երրորդ ուժի հետ: