Դալլաքյանին Հայրիկյանի մոտ չեն թողել, որ վիրուս չտարածվի

ՀՀ նախագահի թեկնածու Պարույր Հայրիկյանը հիվանդանոցում չի ընդունել իրեն այցելած Վիկտոր Դալլաքյանին: Այսօր ԱԺ-ում Yerkir.am-ը փորձել է Դալլաքյանից պարզել, թե ինչո՞ւ Հայրիկյանը չի ընդունել իրեն, մինչդեռ այս օրերի ընթացքում տասնյակ պաշտոնյաներ են նրա մոտ եղել:

«Երբ ես գնացի հիվանդանոց, Հայրիկյանի օգնականներից մեկին բժիշկներն ասել էին, որ վիրուս չտարածվի, արգելվում է Հայրիկյանի մոտ մտնել, այսինքն` առողջապահական խնդիրներից ելնելով, չեն թողնում, որովհետեւ արդեն շատ մարդ էր մտել մոտը: Այդ տղայի անունն էլ եմ հիշում, որ մոտեցավ ինձ՝ Գագիկ Սարուխանյան: Ինձ ասաց, որ չի կարելի, ես էլ բարեկիրթ մարդ եմ, ասացի՝ խնդիր չկա»,- պատմեց Դալլաքյանը:

Մեր դիտարկմանը, թե իրե՞ն, մասնավորապես, չեն թողել, որ վիրուս չտարածվի, Դալլաքյանն արձագանքեց. «Հա, որովհետեւ գրիպոզ բաներ կա»:

Դալլաքյանը վստահեցրեց, որ Հայրիկյանի հիվանդասենյակ չմտնելու մեջ պետք չէ ինչ-որ ենթատեքստ փնտրել: Ավելին` իր եւ Հայրիկյանի հարաբերությունները փայլուն են: «Մենք իրար հետ ֆուտբոլ ենք խաղացել, իրար հետ պատգամավոր ենք եղել: Երբ իրեն այստեղ՝ ԱԺ-ում ծեծում էին, մեկը ես եմ եղել, որ չեմ թողել, որ ծեծեն»,- հայտարարեց նա:

Խոսելով միջադեպի մասին` Դալլաքյանը կարծիք հայտնեց, որ սա կրակոց էր ՀՀ-ի դեմ: ԱԺ-ում ՀՀ նախագահի ներկայացուցիչը համարում է, որ ե'ւ ներսի, ե'ւ դրսի որոշակի ուժեր շահագրգռված չէին, որ նախագահական ընտրությունները անցնեն «ցիվիլ» պայմաններում: