Նրանք մեր անտառները վստահել են ռուսներին. թուրք ընդդիմադիրները քննադատել են Էրդողանին անհրաժեշտ սարքավորումներ չունենալու համար

Անտառային հրդեհների վերաբերյալ, որոնք Ռեջեփ Թայիփ Էրդողանի գլխավոր խորհրդականն արդեն անվանել է ազգային աղետ, երկրում սկսվել են քննարկումներ և  վերածվել սկանդալի հրդեհաշիջման ինքնաթիռների, ավելի ճիշտ՝ դրանց  բացակայության պատճառով: Թուրքական հրդեհաշիջման ավիապարկը բաղկացած է 9 ինքնաթիռից, որոնցից 6-ը չեն կիրառվում, իսկ մնացած 3-ը ՌԴ-ից վարձակալած «Բե-200» են:

Թուրքական ԶԼՄ-ները հարց են տալիս, թե «ինչու են հակահրդեհային ինքնաթիռները անգարներում, երբ այրվում են անտառները»։

Պարզվել է, որ 2019 թվականին  թուրքական CL-215 6 ինքնաթիռ չի անցել մրցույթն այն պատճառաբանությամբ, որ դրանց ջրատարողունակությունը պահանջվածից 100 լիտրով քիչ  է (ծավալը՝ 4.900 լիտր ջուր, հայտարարված ծավալը՝ 5.000 լիտր): Դրա հիման վրա օդաչուներն ու ավիացիայի անձնակազմը հեռացվել են աշխատանքից, իսկ ինքնաթիռն ուղարկվել է պահեստավորման:

Այս պատմությունից հիմնական վնասը կստանա իշխող ԱԶԿ կուսակցությունը, որին ընդդիմությունն արդեն սկսել է մեղադրել կատարվածի մեջ։

Իզմիրից քեմալական պատգամավոր Աթիլա Սերտելը նշում է․ «Այս պահին անգարներում 6 ինքնաթիռ կա, որոնցից 2-ը վերանորոգման կարիք ունեն, իսկ 4-ը կարող էին գործարկվել։ Սակայն անձնակազմի հեռացման պատճառով հնարավոր չէ դրանք գործարկել: Նրանք գործարք կնքեցին ռուսների հետ և նրանց վստահեցին թուրքական անտառները»։

Մերսին քաղաքից քեմալական կուսակցության պատգամավոր Ալփայ Անթմենն էլ նշել է․ «Մերսինն այրվում է: Հրդեհը տարածվել է նաև բնակելի տարածքների վրա: Նախագահական պալատն ունի գումար 13 ինքնաթիռի համար, բայց ոչ՝ մի հրշեջի համար»:

Պատգամավոր Շերաֆեթթին Թուրփջուն էլ ասել է, որ «այս իրավիճակը պարզապես անփութություն չէ, այլ բացահայտ դավաճանություն»։